تۇركيانىڭ سۇريامەن شەكارالاس افرين ايماعىنداعى كۇرد جاساقتارىنا قارسى شابۋىل جاساۋ تۋرالى مالىمدەمەسىنەن كەيىن، رەسەي وسى ماڭداعى ءوز اسكەرىن بولاشاق قاقتىعىس الاڭىنان الىس اۋداندارعا الىپ كەتۋدى باستادى. بۇل تۋرالى تۇركيانىڭ ناتو-داعى وكىلى احمەت بەرات كونكار ءال-جازيراعا بەرگەن سۇحباتى بارىسىندا حابارلادى. مۇنداي شەشىم وسى بەيسەنبى كۇنى ماسكەۋدە وتكەن تۇركيا اسكەرىنىڭ باسشىسى حۋلۋسي اكاردىڭ رەسەيلىك ارىپتەسى ۆالەري گەراسيموۆ جانە رەسەيدىڭ وزگە دە بارلاۋ قىزمەتىنىڭ وكىلدەرىمەن بولعان كەزدەسۋى بارىسىندا قابىلدانعان. 

سوڭعى ءبىر اپتا كولەمىندە الەمدىك اقپارات اگەنتتىكتەرى اقش-تىڭ ءسۇريا مەن تۇركيا شەكاراسىندا 30 مىڭ اسكەريدەن تۇراتىن "شەكارا جاساعىن" قۇراتىنى، ونىڭ باسىم بولىگىن وسى اۋماقتا "يسلام مەملەكەتى" لاڭكەستىك ۇيىمىنا قارسى كۇرەس جۇرگىزىپ كەلە جاتقان ء"سۇريا دەموكراتيالىق كۇشتەرىنە" كىرەتىن YPG (كۇرد دەموكراتيالىق وداعى پارتياسىنىڭ قارۋلانعان اسكەرى) ۇيىمىنىڭ كۇرد اسكەرى قۇرايتىنى تۋرالى جارىسا جازدى. وسى حابارلامادان سوڭ، تۇركيا شەكارادا كۇرد جاساقتارىنان اسكەر قۇرىلۋى ءوز ەلىنە قاۋىپ توندىرەدى دەپ تاۋىپ، افرين ايماعىنداعى YPG (كۇرد دەموكراتيالىق وداعى پارتياسىنىڭ قارۋلانعان اسكەرى) كۇشتەرىنىڭ كوزىن جويۋعا ارنايى اسكەري وپەراتسيا باستايتىنىن مالىمدەدى.

ءوز كەزەگىندە اقش-تىڭ مەملەكەتتىك حاتشىسى رەكس تيللەرسون تۇركيا بولعان جايتتى دۇرىس تۇسىنبەگەنىن، ەشقانداي شەكارا اسكەرى قۇرىلمايتىنىن، كۇرد توپتارىمەن بىرلەسكەن جاتتىعۋلار مەن دايىندىقتار "يسلام مەملەكەتى" لاڭكەستىك ۇيىمى سودىرلارىنىڭ شەكارا اسىپ قۇتىلىپ كەتۋ جولدارىن بوگەۋگە ارنالعانىن ايتىپ، اعىنان جارىلدى. دەگەنمەن احمەت بەرات كونكار ءال-جازيرانىڭ تىلشىسىنە ەشقانداي مەملەكەت تۇركيانى العان بەتىنەن قايتارا المايتىنىن جەتكىزگەن. ول: "باسقا مەملەكەتتەردىڭ تۇركياعا قاتىستى ۇندەۋلەرى بار بولعانى اسكەري وپەراتسيانىڭ تەحنيكالىق دەتالدارى مەن ستراتەگيالىق بارىسىن عانا وزگەرتۋى مۇمكىن. بىراق ونى بولدىرماۋعا اسەر ەتە المايدى", - دەدى.

سونداي-اق ناتو-داعى تۇرىك دەلەگاتسياسىنىڭ باسشىسى: ء"بىزدىڭ ناتو-داعى وداقتاسىمىز اقش-قا قاراعاندا، رەسەيمەن بايلانىسىمىز جەمىستى بولىپ وتىر. رەسەي تۇركيا ءۇشىن ماڭىزدى ماسەلەگە (كۇردتەر توندىرەتىن قاۋىپ) تۇسىنىستىك تانىتقان كەزدە، اقش YPG ۇيىمىن قارجىلاندىرىپ، ولارعا قارۋ بەرۋدى ءجون دەپ تاپتى" دەگەن وي قوستى.

تۇركيا مەملەكەت ىشىندەگى كۇردتەردىڭ جۇمىسشى پارتياسىنىڭ ونداعان جىلدار بويى جالعاسىپ كەلگەن قارسىلىقتارىنان كەيىن، سۇرياداعى YPG ۇيىمىن اتالعان پارتيامەن بايلانىسى بار دەپ تانىپ، ونى تەرروريستىك توپتار تىزىمىنە قوسقان. 2017 جىلدىڭ مامىر ايىندا اق ۇيدەگى كەزدەسۋ كەزىندە تۇركيا پرەزيدەنتى رەدجەپ تايىپ ەردوعاننىڭ تىكەلەي قارسىلىق بىلدىرگەنىنە قاراماستان، اقش پرەزيدەنتى دونالد ترامپ سۇرياداعى كۇرد جاساقتارىن، اتاپ ايتقاندا YPG ۇيىمىن قارۋلاندىرۋ تۋرالى شەشىم قابىلدادى. كەيىننەن اتالعان ۇيىم راكحا قالاسىن ازات ەتۋگە ايتارلىق ۇلەس قوستى.

وتكەن جىلدىڭ قاراشا ايىندا دونالد ترامپتىڭ سۇرياداعى كۇرد جاساقتارىنا قارۋ جەتكىزۋدى توقتاتقانى تۋرالى حابارلاماسى دا امەريكانىڭ تۇركيامەن قارىم-قاتىناسىنا وڭ اسەر ەتە المادى.

“The Qazaq Times”