ءسۇريا ۇكىمەتى ءوز تەرريتورياسىنا ۇشىپ كىرگەن تۇركيانىڭ اسكەري ۇشاقتارىن اتىپ تۇسىرەتىنىن مالىمدەدى. بۇل شەشىم وسىعان دەيىن تۇركيانىڭ سۇرياداعى افرين ايماعىندا ورنالاسقان كۇرد جاساقتارىنىڭ كوزىن جويۋ ءۇشىن اسكەري وپەراتسيا باستايتىنى جونىندەگى  حابارلاماسىنا بايلانىستى قابىلدانىپ وتىر. بۇل تۋرالى ءال-جازيرا اقپاراتتىق اگەنتتىگى جازدى.

تۇركيا تاراپىنان تاراتىلعان ءسۇريانىڭ شەكارالىق ايماقتارىنداعى كۇرد جاساقتارىنا كەز كەلگەن ۋاقىتتا شابۋىل جاساۋى مۇمكىن ەكەندىگى تۋرالى مالىمدەمە اقش-تىڭ "يسلام مەملەكەتى" لاڭكەستىك ۇيىمىنا قارسى كۇرەسكەن كۇرد اسكەري جاساقتارىمەن بىرلەسىپ شەكارا اسكەرىن قۇرۋ تۋرالى باستاماسىنان كەيىن جاسالدى. ويتكەنى YPG دەپ اتالاتىن كۇرد جاساقتارىنىڭ باسىم بولىگىن قۇرايتىن ءسۇريانىڭ دەموكراتيالىق كۇشتەرى اقش جوسپارلاعان 30 مىڭ ادامنان تۇراتىن "شەكارا اسكەرىنىڭ" قۇرامىنا كىرەتىنى ايتىلدى. تۇركيادا بۇل YPG ۇيىمى تەرروريستىك توپتاردىڭ قارا تىزىمىنە ىلىنگەن. ءوز ەلىندە كۇردتەردىڭ كوپ جىلعى قارسىلىعىمەن ءجيى ۇشىراسىپ كەلگەن تۇركيا ۇكىمەتى سۇريامەن شەكارادا اقش قولدارىنا قارۋ بەرىپ، جاتتىقتىرعان كۇرد جاساقتارىنىڭ بولعانىن قالامادى.

كۇنى كەشە اقش-تىڭ مەملەكەتتىك حاتشىسى رەكس تيللەرسون تۇركيانىڭ "شەكارا اسكەرى قۇرىلسا، قوس مەملەكەتتىڭ قارىم-قاتىناسى قيىنداي تۇسەدى" دەگەن ەسكەرتپەسىنەن كەيىن، جاعداي  كەي ادامداردىڭ ويلارىن دۇرىس جەتكىزبەگەندىگىنەن قاتە تۇسىندىرىلگەنىن،  شىن مانىندە امەريكانىڭ كۇرد جاساقتارىمەن ەشقانداي بايلانىسى جوقتىعىن جاريالادى.

SANA اقپاراتتىق اگەنتتىگىنىڭ دەرەگىنە سايكەس،، ءسۇريانىڭ سىرتقى ىستەر ءمينيسترى فايسال ءال-ميحداد: ء"سۇريانىڭ اۋە كەڭىستىگىنە تۇركيانىڭ اسكەري ۇشاقتارى كىرسە، ولاردى اتىپ تۇسىرەتىنىمىزدى ەسكەرتەمىز", - دەپ حابارلاعان.

“The Qazaq Times”