جەتىم بالالاردى اسىراپ العان تۇلعالار تابىس سالىعىنان بوساتىلادى. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە ۇلتتىق ەكونوميكا ۆيتسە-ءمينيسترى رۋسلان دالەنوۆ مالىمدەدى.

"جەتىم بالانى اسىراپ العاندار جىل سايىن تابىس سالىعىنان بوساتىلادى. بۇل شامامەن جىلىنا ەكى ميلليوننان استام تەڭگەنى قۇرايدى. ياعني مۇنداي سوماداعى سالىق بولمايدى", - دەدى ول جاڭادان كۇشىنە ەنگەن سالىق كودەكسىن ءتۇسىندىرۋ كەزىندە.

بايانداما بويىنشا، سالىقتان بوساتىلاتىن ناقتى سوما 2,1 ملن تەڭگەنى قۇرايدى. قازاقستاندا جەكە تابىس سالىعى سالىق كولەمىنىڭ 10 پايىزىن قۇرايدى. وسىلايشا اسىراۋشى اتا-انا جىلىنا 210 مىڭ تەڭگە سالىقتى تولەمەيدى.

دالەنوۆتىڭ سوزىنشە، اتا-انانىڭ بىرەۋى  بالا 16 جاسقا تولعانشا جىل سايىن بۇل سالىقتى تولەۋدەن بوساتىلماق. بۇل قازاقستاندا بالا اسىراپ العان بارلىق اتا-انالارعا قاتىستى نورما.

"ال ەگەر بالانى اسىراپ العان اتا-انانىڭ بىرەۋى مۇگەدەك بولىپ قالعان جاعدايدا ولارعا جەر سالىعى، تىركەۋ جانە باج سالىعى بويىنشا جەڭىلدىكتەر بەرىلەدى", - دەدى ول.

“The Qazaq Times”