2018 جىلعى 11 قاڭتاردا انگليانىڭ اپەللياتسيالىق سوتىنىڭ ازاماتتىق ىستەر جونىندەگى سوت القاسى مولدوۆانىڭ ازاماتى ا.ستاتي جانە باسقالارىنىڭ قازاقستان پايداسىنا شىعارىلعان سوت شەشىمىنە شاعىم جاساۋعا رۇقسات بەرۋ جونىندەگى ءوتىنىشىن قابىلداماي تاستادى. ءوتىنىش 2017 جىلعى 6 ماۋسىمدا بەرىلگەن، دەپ حابارلادى قر ادىلەت مينيسترلىگىنىڭ ءباسپاسوز قىزمەتى.

"انگليانىڭ جوعارى سوتى 2017 جىلعى 6 ماۋسىمداعى ءوز شەشىمىندە قازاقستان رەسپۋبليكاسىنىڭ "2013 جىلعى 19 جەلتوقسانداعى تورەلىك تريبۋنالدىڭ شەشىمى الاياقتىققا نەگىزدەلگەن جانە ونىڭ ورىندالۋى انگليانىڭ قوعامدىق تارتىبىنە قايشى كەلەدى" دەگەن  مالىمدەمەسىن قولدادى", - دەلىنگەن حابارلامادا.

مينيسترلىكتىڭ مالىمەتىنشە، بۇدان بۇرىن، 2017 جىلعى 27 ماۋسىمدا  انگليانىڭ جوعارى سوتى دا ا.ستاتيگە الاياقتىق فاكتىلەرىن اعىلشىن ءادىل سوتىندا ءمانى بويىنشا قاراۋعا مۇمكىندىك بەرگەن شەشىمگە شاعىم جاساۋعا مۇمكىندىك بەرۋدەن باس تارتقان.

"قازاقستان رەسپۋبليكاسى تالاپكەرلەر تاراپىنان ورىن العان الاياقتىق فاكتىلەرىن دالەلدەۋدى جالعاستىرادى جانە شامامەن 2018 جىلعى قازان ايىنا بەلگىلەنگەن تىڭداۋلاردا ءتيىستى دالەلدەردى ۇسىناتىن بولادى. اتالعان ءىس بويىنشا مەملەكەتتىڭ مۇددەلەرىن ءبىلدىرۋدى جانە قورعاۋدى «Herbert Smith Freehills LLP» حالىقارالىق زاڭ فيرماسىنىڭ قاتىسۋىمەن قر ادىلەت مينيسترلىگى قامتاماسىز ەتۋدە", - دەلىنگەن ۆەدومستۆو حابارلاماسىندا.

ايتا كەتەيىك، 2017 جىلدىڭ جەلتوقسان ايىندا مولدوۆالىق بيزنەسمەن ستاتي  تۇسىرگەن شاعىمىنا بايلانىستى قازاقستان ۇلتتىق قورىنىڭ 22 ملرد دوللارى بۇعاتتالعان ەدى. ازىرگە بۇل قاراجاتتىڭ قالاي قايتارىلاتىنى بەلگىسىز.

“The Qazaq Times”