وڭتۇستىك كورەيا الەم ەلدەرىنىڭ ەسكەرتۋلەرىنە قاراماستان، پيوڭياڭمەن جاندانا باستاعان قارىم-قاتىناسىن نىعايتۋعا كۇش سالاتىنىن مالىمدەدى. وسىدان الدىن بولعان ەكىجاقتى كەلىسسوزدەر كەزىندە سولتۇستىك كورەيا پيوڭچاڭدا وتەتىن قىسقى وليمپيادا ويىندارىنا سپورتشىلارىن جىبەرەتىنى جانە قوس مەملەكەتتىڭ حوككەيدەن ايەلدەر قۇراماسى ءبىر تۋدىڭ استىندا ونەر كورسەتەتىنى جونىندە مامىلە جاسالعان ەدى. بىرقاتار الەم باسشىلارى كحدر-نىڭ جۇمساق مىنەز تانىتقانىن سانكتسيالاردىڭ اسەرى دەپ باعالاپ، ەكونوميكالىق قىسىمدى ونان ءارى كۇشەيتە ءتۇسۋدى ۇسىنىپ وتىر. بۇل تۋرالى ۆۆس اقپاراتتىق اگەنتتىگى جازدى. 

وسىدان بۇرىن كانادادا وتكەن جيىن كەزىندە جاپونيانىڭ پرەمەر-ءمينيسترى تارو كونو سولتۇستىك كورەيانىڭ ديپلوماتياعا وڭاي كونگەنىنەن كۇدىكتەنىپ، وڭتۇستىك كورەيامەن بايلانىسىن قايتا جاڭعىرتۋىن يادرولىق قارۋ باعدارلاماسىن جالعاستىرۋ ءۇشىن قولايلى جاعداي قالىپتاستىرۋعا ۋاقىت ۇتۋ ءتاسىلى دەپ تانىعان ەدى. اقش-تىڭ مەملەكەتتىك حاتشىسى رەكس تيللەرسون دا "سانكتسيالار اۋىر سوققى بولدى" دەپ، ەكونوميكالىق قىسىم شارالارىن جالعاستىرۋ سولتۇستىك كورەيانى كەلىسسوزدەر ۇستەلىنە وتىرۋعا ءماجبۇر ەتەتىنىنە سەنىم ءبىلدىردى.

وڭتۇستىك كورەيانىڭ سىرتقى ىستەر ءمينيسترى كان كەن ۆا: ء"بىز جىلدار بويى كەلىسسوزدەر جۇرگىزۋگە تالپىنىس ءبىلدىرىپ كەلگەندىكتەن، سولتۇستىك كورەيانى وزگەلەرگە قاراعاندا جاقسىراق بىلەمىز دەپ ويلايمىز. وسىعان دەيىن ەكىجاقتى قارىم-قاتىناستاردا العا ىلگەرىلەۋ مەن وڭ ناتيجە بولماعان ەدى. ەندى سونداي مۇمكىندىك تۋىپ وتىر. ءبىز قولىمىزدان كەلگەننىڭ ءبارىن جاساۋ كەرەكپىز", -دەدى.

“The Qazaq Times”