«سامجيون» ۇرلەمەلى-شەرتپەلى اسپاپتار وركەسترى. فوتو: AFP.

وڭتۇستىك جانە سولتۇستىك كورەيا اراسىندا 9 قاڭتار وتكەن جوعارى دارەجەلى كەلىسسوزدەن كەيىن، تاراپتار بايلانىستى جالعاستى ساقتاپ تۇرۋعا تىرىسۋدا. ەكى ەلدىڭ وكىلدەرى 15 قاڭتاردا ەكى ەل شەكاراسىنداعى بەنمونجوم شەكارا ايماعىنىڭ سولتۇستىك كورەيا جاعىندا كەزدەسۋ وتكىزدى. كەزدەسۋدەن كەيىن پيوڭچاڭ قىسقى وليمپياداسى قارساڭىندا سولتۇستىك كورەيانىڭ ونەرپازدار توبى وڭتۇستىك كورەيادا گاسترولدىك ساپار جاساۋ تۋرالى كەلىسىمگە كەلگەن. بۇل تۋرالى «People» باسىلىمى حابارلادى.

وڭتۇستىك كورەيا بىرلىككە كەلتىرۋ مينيسترلىگىنىڭ جاساعان مالىمدەمەسىنە قاراعاندا، سولتۇستىك كورەيانىڭ «سامجيون» ۇرلەمەلى-شەرتپەلى اسپاپتار وركەسترىنىڭ 140 ونەرپازى وڭتۇستىك كورەياعا ساپارلاي كەلەدى. ولار ەل استاناسى سەۋل جانە گانگوڭ قاتارلى قالالاردا كونتسەرت بەرەدى. وركەستر مۇشەلەرىنىڭ قاۋىپسىزدىگى مەن بارلىق جاعدايىنا وڭتۇستىك كورەيا جاۋاپتى بولاتىنىن جەتكىزگەن. كونتسەرت وتەتىن ورىندار مەن قولداناتىن قۇرىلعىلاردى الدىن الا تەكسەرۋگە سولتۇستىك كورەيا تارابى ارنايى تەكسەرۋ توبىن جىبەرەتىن بولعان.

اتالعان مينيسترلىكتىڭ كەشەگى مالىمەتىندە، ەكى ەلدىڭ رەسمي وكىلدەرى بەنمونجومدا بۇگىن، 17 قاڭتار قايتالاي كەزدەسىپ، پيوڭچاڭ وليمپياداسىنا قاتىساتىن سولتۇستىك كورەيا وكىلدەر توبىنىڭ جۇمىستارى تۋرالى كەڭەسەدى.

وڭتۇستىك كورەيا جاقتىڭ مالىمدەۋىنشە، ەكى ەل اراسىنداعى كەلىسسوزدەر قازىرگە يادرولىق قارۋ نەمەسە كورەي تۇبەگى قاۋىپسىزدىگى قاتارلى تاقىرىپتاردى قامتىماعان. قىسقى وليمپيادا ويىندارىنا بايلانىستى مادەني اۋىس-كۇيىس ەكى ەل اراسىنداعى تۇسىنىستىك پەن سەنىمدى تەرەڭدەتەدى، بۇل الداعى رەسمي كەلىسسوزدەرگە ۇلكەن جول اشادى دەپ ۇمىتتەنەدى.

“The Qazaq Times”