قىتاي ۇكىمەتى ەلدىڭ ىشكى ايماقتارىندا شەتەلگە شىعاتىن قىتايلىقتارعا بارىنشا جاعداي جاساپ وتىر. وتكەن ءبىر جىلدا ىشكى قىتايدان شەتەلگە شىققان ادام سانى 60 ملن ادامعا جەتىپ، شەتەلدە قۇرىلعان قىتايلىق كاسىپورىندار 30 مىڭنان اسقان. بۇعان قوسا، شەتەلدەردە جۇمىس ىستەپ جاتقان قىتايلىقتار 1 ملن ادام بولسا، ستۋدەنتتەر 1 ملن 370 مىڭ ادامدى قۇراعان. بۇل تۋرالى «People» باسىلىمى حابارلادى.

ەكى كۇن بۇرىن بەيجىڭدە وتكەن ءباسپاسوز ءماسليحاتى كەزىندە، قىتاي ءسىم-ءىنىڭ كونسۋلدىق قىزمەتىنىڭ جەتەكشىسى گو ءشاۋچۇن: «قازىر ەل ازاماتتارىنا 65 ەلگە ۆيزاسىز قاتىناۋعا جاعداي جاسالدى. سونىڭ ىشىندە 10 ەلگە تۇراقتى ۆيزاسىز رەجيم ورناتتىق، جاقىندا تاعى ەكى ەل قوسىلادى. ال، 40 مەملەكەتپەن قىتايلىقتاردىڭ شەكارادان وتكەننەن كەيىن ۆيزا الۋ كەلىسىمىن قولعا كەلتىردىك. 16 ەلدىڭ ۇكىمەتىمەن قىتاي ازاماتتارىنا ءبىر باعىتتا (شەكارادان شىعۋ نەمەسە كىرۋ كەزىندە) ۆيزا الۋ كەلىسىمىن جاسادىق. وعان قوسا، 41 ەلمەن ۆيزا ماسەلەسىن جەڭىلدەتتىك»، – دەگەن مالىمەت جاسادى.

قىتاي بيلىگى ەل ىشىندەگى ازاماتتارىنىڭ شەتەلگە شىعۋىن جەڭىلدەتۋىمەن بىرگە، شەتەلدەگى قىتاي ەلشىلىكتەرىنىڭ سول ەلگە بارعان قىتايلىقتارعا قىزمەت كورسەتۋىن كەمەلدەندىرە تۇسپەك. ولاردىڭ شەتەلدەگى قىتاي ەلشىلىگى ارقىلى قۇجات ءبىتىرۋ قاراجاتىن جەڭىلدەتىپ، ەلەكتروندى ءوتىنىش بەرۋ، پاسپورتى جوعالعان جاعدايدا ەلەكتروندى ءوتىنىش ارقىلى پاسپورت جاساتۋ سىندى جاڭا قىزمەت تۇرلەرىن قوسقان.

قىتاي بيلىگىنىڭ بۇل قادامى ەلدەگى حالىق سانىمەن قاتار وسكەن الەۋمەتتىك تاعى باسقا دا پروبلەمالاردى شەشۋ جولى رەتىندە جاساۋدا. ياعني، بۇل قىتايدىڭ «ادام ەكسپورتى ساياساتى» دەۋگە بولادى. ءوندىرىس قۋاتى دامىعانىمەن قورشاعان ورتاسى مەن شيكىزات تاپشىلىعى، ازىق-تۇلىك قاۋىپسىزدىگىنەن تۋىنداعان قيىنشىلىقتار الدىندا تەك تاۋار ەكسپورتى قىتايدى اسىراۋعا قابىلەتسىزدىگىن تانىعان قازىرگى بيلىك، ەلدەگى حالىقتى ءتۇرلى جولدارمەن سىرتقا شىعارۋعا تىرىسۋدا. ول ءۇشىن شەتەلدەردە كاسىپورىندار مەن ورتالىقتاردى كوپتەپ قۇرۋدا. سول ەلدىڭ اقپاراتتىق سايتتارىنىڭ كورسەتۋىنشە، سوڭعى بەس جىلدا قىتايدان شامامەن 150 ملن ادام شەتەلگە كەتكەن.

“The Qazaq Times”