ۇلىبريتانيانىڭ زاڭ شىعارۋشىلارى كوفەگە ارنالعان  بىر رەت قولدانىلاتىن ىدىستار ءۇشىن "لاتتەگە ارنالعان سالىق" ءتۇرىن ەنگىزۋدى ۇسىنىپ وتىر. ياعني ءىرى قالالارداعى قوقىس مولشەرىن ازايتۋ ماقساتىندا اتالعان ىدىس تۇرىنە 25 پەنس (شامامەن 100 تەڭگە) ارتىق تولەنۋى مۇمكىن. ال الداعى 5 جىل ىشىندە بۇل ىدىس تۇرلەرىنە مۇلدە تىيىم سالۋ ۇسىنىلدى.

ەكولوگيالىق اۋديت جونىندەگى پارلامەنت كوميتەتىنىڭ بايانداماسىندا ايتىلعانداي، جىل سايىن بريتاندىقتار كوفە ءىشۋ كەزىندە 2,5 ميللياردتان اسا ءبىر رەتتىك كوفە ىدىسىن قوقىسقا تاستايدى ەكەن. بۇل شامامەن 30 مىڭ توننانى قۇرايدى. ال ونىڭ تەك 0,25 پايىزى عانا قايتا وڭدەلەدى. سەبەبى كوفە ىدىستارى قاتتى كارتون مەن پوليەتيلەن قوسپاسىنان جاسالعاندىقتان ونى ءبىر بىرىنەن ءبولىپ الۋ قيىن. سوندىقتان بۇل ىدىس تۇرلەرى قاعاز نەمەسە تسەلليۋلوزا كومبيناتتارىندا قايتا وڭدەپ شىعۋعا قابىلدانبايدى ەكەن.

كوميتەتتىڭ مالىمەتىنشە، جاڭا سالىقتان تۇسكەن قارجىنى ءبىر رەتتىك ستاقانداردى جانە وسىعان ۇقساس قوقىس تۇرلەرىن قايتا وڭدەيتىن ارنايى كاسىپورىن اشۋعا جۇمساۋعا بولادى. سونداي-اق، كوميتەت كوفە ساتاتىن ورىنداردى ۋتيليزاتسيا ءۇشىن ارتىق تولەۋگە جانە ورتاعا كەلتىرىپ وتىرعان زياندار تۋرالى تۇتىنۋشىلارعا اقپارات بەرەتىن جازبالاردى كوبەيتۋگە مىندەتتەۋدى ۇسىنىپ وتىر. The Guardian اقپارات اگەنتتىگىنىڭ مالىمەتىنشە، قازىرگى كەزدە كەيبىر كوفە ساتاتىن ورىندار وزدەرىنىڭ ستاقانىمەن نەمەسە شىنىاياعىمەن كەلگەن كليەنتتەرگە جەڭىلدىكتەر جاساۋدى قولعا العان، بىراق مۇنىڭ ءوزى تەك 1-2 پايىزدى عانا قۇرايدى.

بۇدان بولەك، جەلتوقسان ايىندا ەكولوگيالىق اۋديت جونىندەگى كوميتەت ۇلىبريتانيا ۇكىمەتىنە قالدىقتاردىڭ مولشەرىن ازايتۋ ءۇشىن پلاستيكالىق بوتەلكەلەرگە دەپوزيتتىك تولەمدەر جۇيەسىن ەنگىزۋگە كەڭەس بەرگەن.

“The Qazaq Times”