2017 جىلى وڭتۇستىك قازاقستان وبلىسىندا 1543,3 شاقىرىم جول مەن 19 كوپىردىڭ  جوندەۋ جۇمىستارى باستالعان.  اتقارىلعان جۇمىستاردىڭ ناتيجەسىندە وڭىردە 762,2 شاقىرىم جول مەن 19 كوپىر پايدالانۋعا بەرىلدى. ال قالعان 781,1 شاقىرىم جول بيىل پايدالانۋعا بەرىلەدى، دەپ حابارلايدى وقو اكىمدىگىنىڭ ءباسپاسوز قىزمەتى. 

وبلىستىق جولاۋشىلار كولىگى جانە اۆتوموبيل جولدارى باسقارماسى تاراتقان اقپارات بويىنشا، بۇعان وبلىستىق  بيۋدجەتتەن 27  ملرد.  269,2 ملن تەڭگە باعىتتالسا،  وبلىستىق ماڭىزى بار 51 نىسانعا 6,5 ملرد تەڭگە، اۋدان، قالا اكىمدىكتەرىنە 417 نىسانعا 9,8 ملرد تەڭگە جانە شىمكەنت قالاسىنىڭ 112 نىسانىنا 10,9 ملرد تەڭگە بولىنگەن.

وبلىستاعى اۆتوموبيل جولدارى مەن ەلدى مەكەن كوشەلەرىنىڭ  جالپى ۇزىندىعى 20 928,9 شاقىرىمدى  قۇرايدى. ونىڭ 837 شاقىرىمى رەسپۋبليكالىق،  4261,2 شاقىرىمى وبلىستىق، 1 642,7 شاقىرىمى اۋداندىق ماڭىزى بار جولدار.

سونداي-اق، شىمكەنت اۋماعىنداعى وبلىستىق ماڭىزى بار اۆتوموبيل جولدارىنىڭ بويىندا  410 كوپىر بار. ونىڭ 291-ى قاناعاتتانارلىق جاعدايدا بولسا، 119 كوپىر جوندەۋدى قاجەت ەتەدى.  2017 جىلى  سونىڭ 19-ى كۇردەلى جوندەۋدەن وتكەن.  وعان قوسا، 24 كوپىردە قۇرىلىس-جوندەۋ  جۇمىستارىن جۇرگىزۋگە ءتيىستى قۇجاتتاما ازىرلەنۋدە. قالعان 77 كوپىر كەزەڭ-كەزەڭىمەن ءتيىستى قۇجاتتار ازىرلەنىپ، قالپىنا كەلتىرىلەتىن بولادى.

“The Qazaq Times”