فرانتسيا پرەزيدەنتى ەمانۋەل ماكرون جالعان اقپاراتتارمەن كۇرەسۋگە ارنالعان جاڭا زاڭ جوباسىنىڭ جوسپارىن تانىستىردى. ول سايلاۋ ۋاقىتىندا الەۋمەتتىك جەلىلەردەگى ونلاين جاريالانىمدارعا قويىلاتىن تالاپتار كۇشەيۋى مۇمكىن ەكەنىن اتاپ ءوتتى. فرانتسيانىڭ مەملەكەت باسشىسى وسىعان دەيىن رەسەيدىڭ باق ارقىلى ەۋروپا مەن اقش-تاعى قوعامدىق پىكىرگە ايتارلىقتاي ىقپال جاساۋعا تىرىساتىنىن ايتقان بولاتىن. ساراپشىلار جاڭا زاڭنىڭ رەسەيدىڭ اقپاراتتىق سوعىسىنا قارسى قولدانىلىپ وتىرعان شارا ەكەنىنە سەنىمدى. بۇل تۋرالى ۆۆس اقپارات اگەنتتىگى جازدى. 

نيۋ-يوركتە وتكەن باق وكىلدەرىمەن كەزدەسۋدە ەمانۋەل ماكرون الەۋمەتتىك جەلىلەردە جالعان اقپارات جاريالاۋ تەندەنتسياسىنىڭ ارتىپ كەلە جاتقانىنا توقتالدى. "بۇكىل الەمدە جالعان مالىمەت تاراتىپ، بەلگىلى تۇلعالار مەن ساياساتكەرلەردى قارالاۋعا جۇمىس ىستەيتىن مىڭداعان الەۋمەتتىك جەلى پاراقشالارى بار", - دەدى ول.

حالىقتى رەسمي راستالماعان دەرەكتەردەن قورعاۋ ءۇشىن ول الەۋمەتتىك جەلى پاراقشالارى كونتەنتىنىڭ اقپارات كوزىن تەكسەرۋ مۇمكىندىگىن ەنگىزۋدى ۇسىندى. سونداي-اق دەمەۋشىنىڭ تاپسىرماسىمەن جاريالاناتىن ماتەريالدارعا شەك قويىلۋى كەرەكتىگى دە ايتىلدى. ء"بىز دەموكراتيانى جالعان جاڭالىقتاردان قورعاۋىمىز كەرەك", - دەدى فرانتسيا پرەزيدەنتى.

وتكەن جىلدىڭ مامىر ايىندا ەمانۋەل ماكرون رەسەي پرەزيدەنتى ۆلاديمير پۋتينمەن بىرگە وتكەن ءباسپاسوز كونفەرەنتسياسىندا رەسەيلىك RT جانە  Sputnik تەلەارنالارىن جالعان پروپاگاندا تاراتادى دەپ ايىپتاعان بولاتىن. سول وقيعادان كەيىن اتالعان تەلەارنالار فرانتسۋز تىلىندە جاڭالىق تاراتا باستادى.

“The Qazaq Times”