بيتكوين كۋرسى قۇلدىراپ كەتتى

الەمگە ەڭ تانىمال كريپتوۆاليۋتا بيتكوين كۋرسى ءبىر تاۋلىك ىشىندە بىردەن 18 پايىزعا ارزانداپ، 13030 دوللارعا دەيىن ءتۇستى. بۇل تۋرالى CoinMarketCup پورتالىندا جازىلدى، دەپ حابارلايدى ريا نوۆوستي.

2017 جىلدىڭ 17 جەلتوقسانىندا بيتكويننىڭ قۇنى 20 مىڭ دولللارعا دەيىن قىمباتتاعان بولاتىن. وسىنداي رەكوردتىق كورسەتكىشپەن سالىستىرعاندا بيتكويننىڭ قۇنى 30 پايىزعا ارزاندادى دەۋگە بولادى. ال  Bitcoin Cash بالاما كريپتوۆاليۋتاسى 30 پايىزعا نەمەسە 2536 دوللارعا دەيىن ارزانداعان.

ساراپشىلاردىڭ سوزىنشە، كريپتوۆاليۋتانىڭ بولاشاعىنا قاتىستى جاعىمسىز بولجامدار ونىڭ كۋرسىنا اسەر ەتىپ وتىر. ويتكەنى 19 جەلتوقسان كۇنى Bitcoin.com كومپانياسىنىڭ نەگىزىن قالاۋشى ەميل ولدەنبۋرگ بيتكويننىڭ ساۋدا ۆاليۋتاسى رەتىندە بولاشاعى جوق ەكەنىن ايتسا، بيتكويندى زاڭداستىرعان  جاپونيانىڭ قارجى ءمينيسترى ونى سەنىمدى اكتيۆ رەتىندە سانامايتىنىن مالىمدەگەن.

ايتا كەتەيىك، ەلەكتروندى اقشانىڭ بۇل تۇرىنە قاتىستى ماسەلەلەر سوڭعى كەزدە قازاقستاندا دا ءجيى تالقىلانا باستاعان. قارجىگەرلەردىڭ ءبىرى مۇنى زاڭداستىرۋدى ۇسىنسا، ەندى ءبىرى بيتكويننىڭ قاۋىپتى ەكەنىن ايتادى.

“The Qazaq Times”