جەلتوقسان ايىنىڭ 17-ءسى مەن 19-ى ارالىعىندا الماتى وبلىسىنىڭ تالعار اۋدانىنداعى «Almaty Horse and Polo Club»  ات سپورتى كەشەنىندە شوگەننەن قازاقستان رەسپۋبليكاسىنىڭ تاۋەلسىزدىك كۇنىنە وراي ۇيىمداستىرىلعان تۋرنير بولىپ ءوتتى.

تۋرنيرگە «اۋليەاتا» شوگەن كلۋبى، «Astana Polo Club»،  «Almaty Polo Club»، «Almaty Horse & Polo Club» جانە «Tu’lpar Polo Club»  كوماندالارى قاتىستى. ءۇش كۇنگە سوزىلعان تارتىستى ويىندا «Almaty Polo Club» كومانداسى ءبىرىنشى ورىن، «Astana Polo Club» قۇراماسى ەكىنشى ورىن، «اۋليەاتا» شوگەن كلۋبى ءۇشىنشى ورىن الدى. ءۇشىنشى ورىن ءۇشىن وتكەن ويىندا  «اۋليەاتا» شوگەن كلۋبى «Almaty horse & Polo Club» كومانداسىمەن كەزدەسىپ، 6:1 ەسەبىمەن جەڭىسكە جەتتى. وسى ويىندا قارسىلاسىنىڭ قاقپاسىنا 3 گول سوققان «اۋليەاتا» كومانداسىنىڭ كاپيتانى نۇرداۋلەت مومىنوۆ ويىننان كەيىن تۋرنير جايىندا پىكىر ءبىلدىردى. ول وندا: «بۇگىن وتە جاقسى ويىن بولدى. استانا مەن الماتى قالالارىنىڭ كوماندالارى حالىقارالىق تۋرنيرلەردىڭ جەڭىمپازدارى ەكەندىگى بەلگىلى. ءبىز بۇگىن ولارعا لايىقتى قارسىلاس بولعانىمىزعا قۋانىپ تۇرمىز. جالپى، كوكپاردان كەيىن شوگەن ويناۋ اسا ءبىر قيىندىق تۋعىزبايدى. الداعى تۋرنيرلەردە ءبىرىنشى ورىن الۋعا تىرىسىمىز» - دەدى.

ال ءبىرىنشى ورىن ءۇشىن بولعان ويىندا «Almaty Polo Club» كومانداسى «Astana Polo Club» قۇراماسىن 3:2 ەسەبىمەن جەڭدى. ايتا كەتەتىن ءبىر جايت، بۇعان دەيىن ءدال وسى ەكى كوماندا تامىز ايىندا وتكەن قازاقستان چەمپيوناتىندا فينالدا كەزدەسكەن بولاتىن. ول كەزدە استانالىقتار الاڭ يەلەرىن 6:4 ەسەبىمەن تىزە بۇكتىرىپ، قازاقستان رەسپۋبليكاسىنىڭ 2017 جىلعى چەمپيوندارى اتانعان.

قازاقستان شوگەن فەدەراتسياسى 2012 جىلى قۇرىلعان. سول ۋاقىتتان باستاپ قازاق شوگەنشىلەرى ءتۇرلى حالىقارالىق تۋرنيرلەردىڭ جەڭىمپازدارى اتانىپ ۇلگەرگەن. ال 2014 جىلى قازاقستان حالىقارالىق شوگەن فەدەراتسياسىنا مۇشەلىككە قابىلدانعان.

“The Qazaq Times”