وڭتۇستىك كورەيا پرەزيدەنتى بەيجىڭ ساپارىن باستادى. فوتو: WSJ.

وڭتۇستىك كورەيا پرەزيدەنتى ءمۇن جايننىڭ ءۇش كۇندىك قىتاي ساپارى كەشە، 13 جەلتوقسان كۇنى باستالدى. وڭتۇستىك كورەيا پرەزيدەنتىنىڭ بۇل ساپارى قىتايمەن بولعان ەكىجاقتى قاتىناستاردى رەتتەۋگە باعىتتالعان. ول قىتاي ورتالىق قالاسى بەيجىڭگە بارعاننان كەيىن قىتاي، وڭتۇستىك كورەيا جانە اقش ءۇش ەل سولتۇستىك كورەيا قايشىلىعىن كەلىسسوز ارقىلى شەشۋدىڭ جولدارىن قاراستىراتىنىن مالىمدەدى. بۇل ترۋالى «WSJ» باسىلىمى حابارلادى.

وڭتۇستىك كورەيا پرەزيدەنتى ءمۇن جاين (Moon Jae-in) قىتايداعى رەسمي ساپارىن باستاۋدان بىرنەشە ساعات بۇرىن، ۋاشينگتون تارابى ءوزىنىڭ سولتۇستىك كورەيامەن كەلىسسوز جۇرگىزۋگە دايىن ەكەنىن حابارلادى. اقش-تىڭ كحدر-عا قاراتقان پوزيتسياسىن جۇمسارتۋى سولتۇستىك كورەيا كورشىلەس ەلدەردىڭ قايشىلىقتى شەشۋگە كۇش بىرىكتىرۋگە ىنتالاندىردى.

وسىدان بۇرىن قىتاي وڭتۇستىك كورەيانىڭ ەل ىشىنە ورنالاستىرماق بولعان اقش-تىڭ زىمىران قورعانىس جۇيەسىنە قارسى رەاكتسيا ءبىلدىرىپ، ناتيجەسىندە قىتاي مەن وڭتۇستىك كورەيا اراسىندا كورەي تۇبەگى ماسەلەسىندە پىكىر قايشىلىعى تۋعان بولاتىن. بۇل سولتۇستىك كورەيانىڭ يادرولىق مۇمكىندىكتەرى مەن بالليستيكالىق زىمىران تەحنولوگياسىن دامىتۋ جونىندەگى كۇش-جىگەرىندە ايماقتاعى ەلدەردىڭ ۇقساماعان كوزقاراسىن قالىپتاستىردى.

قازان ايىندا قىتاي مەن وڭتۇستىك كورەيا باسشىلارى مامىر ايىندا بيلىككە كەلگەن وڭتۇستىك كورەيا پرەزيدەنتىنىڭ بەيجىڭ ساپارىنا جول اشىپ، ەكى ەل اراسىنداعى كەلىسپەۋشىلىكتى قالىپقا تۇسىرۋگە تىرىسقان ەدى. قىتاي باسشىسىنىڭ ۇسىنىسىمەن ساپارلاي بارعان ءمۇن جاين شي جينپيڭمەن ءۇشىنشى رەت كەزدەسىپ وتىر.

قىتاي ءسىم-ءى جاساعان مالىمدەمەدە قىتاي مەن وڭتۇستىك كورەيا ديالوگ پەن كونسۋلتاتسيالار ارقىلى كورەي تۇبەگىنىڭ يادرولىق قارۋسىزدانۋىن جۇزەگە اسىرۋدا ورتاق مۇددەلەر مەن ۇستانىمدارعا جەتۋگە تىرىسقانى ايتىلدى.

قىتاي مەن وڭتۇستىك كورەيا ۇكىمەتتەرىنىڭ كونسۋلتاتسيالارعا جول اشۋى، اقش ۇكىمەتىنىڭ سولتۇستىك كورەياعا قاراتقان پوزيتسياسىنىڭ جاقسارۋى كورەي تۇبەگى قايشىلىعىندا جاڭا ءارى وڭدى بەتبۇرىس دەپ قاراۋعا مۇمكىندىك بەرەدى. الداعى ۋاقىتتا، سولتۇستىك كورەيا كەلىسسوز ۇستەلىنە كەلە قويماسا دا، كەمىندە تاراپتاردىڭ ۇستانىمدارى ءبىر قالىپقا ءتۇسىپ، شيەلەنىستىڭ ءبىرشاما جەڭىلدەي تۇسۋىنەن ءۇمىت زور.

“The Qazaq Times”