ساۋد ارابياسى 35 جىلدان بەرى تىيىم سالىنعان كينوتەاترلاردى قايتا ىسكە قوساتىنىن جاريالادى. ەلدەگى يسلام دىندارلارىنىڭ قىسىمىمەن ساۋد ارابياسىندا 80-ءشى جىلدارى بارلىق كينوتەاترلارعا شەكتەۋ قويىلعان. ەلدىڭ تاق مۇراگەرى مۇحاممەد بين سالمان جاقىندا كينوتەاترلاردىڭ قايتا اشىلاتىنىن مالىمدەدى. بۇل تۋرالى BBC-ءدىڭ رەسمي سايتى حابارلادى.

ساۋد ارابياسى 2030 جىلعا دەيىن ەلدە 300-دەن اسا كينوتەاترلاردى اشۋدى جوسپارلاپ وتىر. بۇعان ۇكىمەت تارابىنان 24 ملن اقش دوللارى كولەمىندە قاراجات بولىنبەك. 300-دەن اسا كينوتەاترلاردا 2 مىڭ كينو زال بولماق، ولارعا 30 مىڭنان اسا جۇمىسشى تارتىلاتىنى ساۋد ارابياسى ۇكىمەتىنىڭ مالىمدەمەسىندە ايتىلدى.

ساۋد ارابياسىنىڭ پاتشا اۋلەتى جانە ءدىني ينستيتۋتتار ۋاحابيزم دەپ تانىلعان ءدىني اعىمدى قولدايتىندىقتان، بۇل ەلدە ءجۇرىپ-تۇرۋدان تارتىپ، كيىم كيىنۋگە دەيىن قاتاڭ قاداعالاۋعا الىنعان. قاتاڭ تىيىمداردىڭ باسىم كوبى ەلدەگى ايەلدەرگە قاراتىلعان. دەگەنمەن، سوڭعى جىلدارى ساۋد ارابياسىندا بىرقاتار بيلىك تارابىنان قاداعالاناتىن قىسىمدار مەن شەكتەۋلەر الىنىپ تاستالۋدا. وسىدان بۇرىن اتالعان ەلدە ايەلدەردىڭ كولىك جۇرگىزۋىنە جانە سپورتتىق شارالارعا بارۋىنا رۇقسات بەرىلدى.

ساۋد ارابياسىنىڭ تاق مۇراگەرى مۇحاممەد بين سالمان 2030 جىلعا دەيىن ەلدە اۋقىمدى رەفورمالاردىڭ جاسالاتىنىن ايتىپ كەلەدى. ونىڭ ايتۋىنشا، بۇل رەفورمالار ساۋد ارابياسى ەكونوميكاسى مەن قوعامدىق جاعدايلارىندا ۇلكەن بۇرىلىستار جاساماق.

“The Qazaq Times”