رەسەي مەملەكەتتىك دۋما دەپۋتاتى ۆيتالي ميلونوۆ قازاقستان، قىرعىزستان جانە بەلارۋس ۇلتتىق وليمپيادا كوميتەتتەرىن رەسەيدى قولداپ، «پحەنچحان-2018 وليمپياداسىنا» قاتىسۋدان باس تارتۋعا شاقىردى.

«ەدينايا روسسيا» پارتياسىنىڭ دەپۋتاتى ۆيتالي ميلونوۆ حالىقارالىق وليمپيادا كوميتەتىنىڭ رەسەيگە قاتىستى شىعارعان شەشىمىنە بايلانىستى مالىمدەمە جاساعان. ول وندا قازاقستان، قىرعىزستان، بەلارۋس ەلدەرىنىڭ ۇلتتىق وليمپيادا كوميتەتتەرىن رەسەيدى قولداپ، «پحەنچحان-2018 وليمپياداسىنا» قاتىسپاۋعا شاقىرعان. ميلونوۆتىڭ سوزىنشە، حالىقارالىق وليمپيادا كوميتەتەنىڭ رەسەيدى وليمپيادادان شەتتەتۋىنىڭ ساياسي استارى بار. بۇنىڭ بارلىعى اقش پەن ناتو ەلدەرىنىڭ يمپەرياليستىك كوزقاراسىنىڭ ناتيجەسى.

ۆيتالي ميلونوۆ قازاقستان، قىرعىزستان، بەلارۋستەن بولەك، بريكس-قا مۇشە برازيليا، ءۇندىستان، قىتاي جانە وڭتۇستىك افريكا ەلدەرىن دە وليمپياداعا قاتىسپاۋعا شاقىرعان.

ەستەرىڭىزگە سالايىق، حالىقارالىق وليمپيادا كوميتەتى رەسەيدى 2014 جىلعى دوپينگ داۋىنا بايلانىستى 2018 جىلى وڭتۇستىك كورەيانىڭ پحەنچحان قالاسىندا وتەتىن قىسقى وليمپيادا ويىندارىنان الاستاتقان بولاتىن. حالىقارالىق وليمپيادا كوميتەتەنىڭ شەشىمى بويىنشا، «پحەنچحان-2018 وليمپياداسىنا» دوپينگ داۋىنا قاتىسى جوق رەسەيلىك سپورتشىلار بەيتاراپ قۇراما اتىنان عانا قاتىسا الادى.

“The Qazaq Times”