بالتاشتىڭ باتىلدىعى

تاۋەلسىزدىك تالاي تارلانداردىڭ تۇعىرىن بيىككە كوتەردى. تالاي ارلانداردىڭ ارمانىن جۇزەگە اسىردى. تاۋەلسىزدىكتىڭ ارقاسىندا قالىقتاعاندار دا، شارىقتاعاندار دا بولدى. ءتىپتى تاۋەلسىزدىكتىڭ تەگىن نانىنا سەمىرگەندەر دە، جىلىگىن جىرتقىشتاي كەمىرگەندەر دە جەتىپ جاتىر. ءيا، ءبارى بار، ءبارى دە بولادى...

بىراق الاش ارىستارىنىڭ ارمانى جۇزەگە استى دەپ، ەل تاۋەلسىزدىككە قادام باستى دەپ، تاقيامىزدى اسپانعا اتقانمەن، ۋاقىت وتە كەلە، حالىق ەكىگە جارىلىپ، باي مەن كەدەيدىڭ اراسى الشاقتاپ، بايلار اسقاقتاپ، كەدەيلەردىڭ قۇر انشەيىن جان ساقتاپ جۇرگەنىنە دە كۋا بولىپ جاتىرمىز.

مەن وسى كەزەڭدە حالىققا ادال ەڭبەك ەتىپ، ماڭداي تەرىن توگىپ، تاۋەلسىزدىككە جان-جۇرەگىمەن قىزمەت ەتكەن تالاي تارلانداردى بىلەمىن. سولاردىڭ ءبىرى، ءبىرى دە بولسا بىرەگەيى، مەنىڭ دوسىم – بالتاش تۇرسىنباەۆ. ەكەۋمىز ءبىر جىلعى ءتول قۇرداس بولعان سوڭ با، الدە ماعان العاشقى بەتتەن-اق ەلىنە دەگەن ادالدىعى، قىزمەتىنە دەگەن ادىلەتتىلىگى ۇنادى ما، ايتەۋىر مەن ونى قاي كەزدە كورسەم دە، ىشتەي رازى بولىپ، قۇرمەت تۇتىپ ءجۇردىم.

مەن العاش بالتاش تۋرالى اڭگىمەنى قازاقتىڭ قادىرلى جازۋشىسى ساكەن سەرى – ءجۇنىسوۆ اعادان ەستىپ، ءوزىم دە تانىسۋعا قۇشتار بولا باستاعان ەدىم. ول كەزدە بالتاش اۋىل شارۋاشىلىعى ءمينيسترى بولاتىن. سول ءبىر قاربالاس قيىن كەزدەردە بالتاشتىڭ باتىل قادامدارىن بايقاعان ەل-جۇرت اڭىزعا بەرگىسىز اڭگىمەلەر ايتىپ ءجۇردى. ۇنەمى قاسىندا جۇرمەگەن سوڭ، ول اڭگىمەلەردىڭ ارتىق-كەمى بولۋى ابدەن زاڭدى. الايدا حالىقتىڭ ءوزىنىڭ قۇرمەت تۇتاتىن ازاماتىنا اسىل سوزدەرىن اياپ قالمايتىنى انىق قوي.

بالتاش ءوزى ومبىنىڭ قازاعى. سول ومبىنىڭ اۋىل شارۋاشىلىعى ينستيتۋتىن ۇزدىكتەردىڭ ءبىرى بولىپ تامامداعان. رەسەيدىڭ وقۋ ورىندارىنىڭ قاي-قايسى بولماسىن سانالى دا ساپالى ءبىلىم جاعىنان تالاي ەلدەن الدا تۇراتىندىعىن سوناۋ كەڭەس ۇكىمەتى كەزىنەن-اق بىلەتىنبىز.

ومبى – بۇرىنعى قازاق جەرى ەكەنى امبەگە ايان. بارعان ادامعا ول ولكەدەن ءالى كۇنگە دەيىن قازاق جەرىنىڭ ءيىسى اڭقىپ تۇرادى. رەسەي قاراماعىندا بولسا دا، ەلدىڭ تۇرمىسى، بولمىسى، ءتىپتى مەنتاليتەتىنە دەيىن قازاق جەرى ەكەنى «مەن مۇندالاپ» تۇرادى. ءتىپتى ەسكى قازاقي اتاۋلارىنا دەيىن وزگەرمەگەن. ماسەلەن، بالتاشتىڭ ءوسىپ-ءونىپ، وقىعان اۋىلى – ارتىقشىل دەپ اتالادى. وسى اۋىل اتىنا ساي، رەسەيدى ايتپاعاندا، قازاقستاننىڭ سولتۇستىك وڭىرلەرىمەن سالىستىرمالى تۇردە قاراساق، ونىڭ الدەقايدا ارتىقشىلىعى بار. ول تەك اتىندا عانا تۇرعان جوق، سول اۋىلداردىڭ ارتىقشىلىعى – كەڭەس ۇكىمەتى كەزىندەگى قالپىن بۇزباي قالعانىندا بولىپ تۇر. بىزدەگىدەي «جەكەشەلەندىرۋ» ناۋقانشىلدىعىنا ۇرىنباي، تۇتاس اۋىل تۋرا كەڭەس كەزىندەگىدەي كەڭ دە، كەمەل كەزىن ۇستاپ وتىر ەكەن. جەكەشەلەنگەننىڭ وزىندە ۇجىمدىق بىرلەستىكتى بۇزباي، سول ەلدىڭ تۇرعىلىقتى حالقىنا قىزمەت ەتىپ جاتىر. سىرتتان كەلگەن دە، كەتكەن دە ەشكىم جوق، سول باياعى ۇلتىمەن، ۇرپاعىمەن ۇيىسىپ، ۇجىمداسىپ، ءومىر-تىرلىكتەرىن جۇيەلى جالعاپ جاتقانىنا كۋا بولدىق. ءبىزدىڭ قازاقستان شارۋاشىلىقتارى دا تۋرا وسىنداي ەدى عوي، ولارعا «نە شاپقىنشىلىق بولدى» دەگەن ويعا ورالاسىڭ. ەلى ورنىندا، جەرى سول قالپىندا، تەحنيكاسى دا، مالى دا ءدىن امان ەلدى كورىپ، قازاق ولكەسىنىڭ وتكەن تىرلىگىنە ساعىنىشپەن قارادىق.

بۇل ولكەدە قازاق حالقىنا تانىمال تالاي تۇلعالار تۋىپ-وسكەن. ەلدى ەڭ قيىن سوعىس جىلدارىندا باسقارعان جۇماباي شاياحمەتوۆ، پارتيا قايراتكەرى فازىل كارىبجانوۆ جانە ەل تۇتقاسىن ۇستاعان تاعى باسقا كىسىلەر شىققان. سولاردىڭ ىشىندەگى جانىبەك كارىبجانوۆتىڭ ەسىمى دە، ءوزى دە ءبىزدىڭ كوڭىلىمىزگە تىم جاقىن، ىستىق تارتادى. بالتاش ەكەۋى ءبىر وڭىردە تۋىپ-ءوسىپ، وقىپ، ءبىلىم العان. العان بىلىمدەرىن اتامەكەنى تاۋەلسىز قازاقستاننىڭ ءوسىپ-وركەندەۋىنە جۇمساعان.

الايدا بالتاش ەكەۋىنىڭ باعىتى ءبىر بولعانىمەن، جولى باسقاشا بولدى. ەكەۋى دە ءبىلىمدى، تاجىريبەلى مامان. مەن جانىبەك ءسالىمۇلىن ءتىپتى ەرتەرەكتەن بىلەمىن. سەبەبى جاڭادان قۇرىلعان تورعاي وبلىسىنىڭ شارۋاشىلىقتارىندا ءىرى-ءىرى باسشىلىق جۇمىستاردا بولدى. العان ءىسىن ابىرويمەن اتقارا ءبىلدى. ەڭبەگى باعالانىپ، باسقارۋدىڭ جوعارعى ەشەلوندارىنان ورىن الدى. وبلىس اكىمى، مينيستر دەگەندەي... الايدا جانىبەكتىڭ «ءلاپپاي تاقسىردىڭ» كۇيىنە ءتۇسىپ، تەك ورىنداۋشى عانا بولىپ قالۋىن كوپشىلىك قاۋىم قابىلدامادى.

بالتاش بولسا، سول كەزدىڭ وزىندە-اق تىم اسىعىس-ۇسىگىس جاسالىپ جاتقان جاپپاي جەكەشەلەندىرۋگە ءوز پىكىرىن باتىل ۇسىندى. تۇبىندە وسى اسىعىستىق بىردەڭەگە ۇرىندىرار دەپ تە قاۋىپتەندىك.

اۋىلدىڭ ءالى كۇنگە دەيىنگى الاڭ جاعدايى بالتاشتىڭ سول كەزدە ايتقان پىكىرلەرىنە دەن قويدىردى. بالتاش وسى اسىعىستىقتىڭ تۇبىندە زاردابى بولاتىندىعىن ءجيى ايتىپ ءجۇردى.

بالتاشتىڭ سول كەزدە اۋىل شارۋاشىلىعى ماماندارىنىڭ ۇلكەن ءبىر باس قوسۋىندا ەلباسىنىڭ جاپپاي جەكەشەلەندىرۋ ۇسىنىسىنا پىكىرى قايشى كەلگەندىگىن كوپشىلىك قاۋىم ءالى كۇنگە دەيىن اڭىز قىلىپ ايتىپ جۇرەدى.

ادەتتەگىدەي، ەل تۇتقاسىن ۇستاپ تۇرعانداي، ەلباسى پىكىرىن كوزىنشە ماقۇلداپ جۇرگەنمەن، سىرتتاي كۇڭكىلدەگەندەرگە دە كۋا بولعانىمىز بار. سول كەزدەگى بالتاشتىڭ باتىل ويلارىن وپپوزيتسيالىق باسىلىمدار ءىلىپ اكەتتى. اقىرىندا تاجىريبەلى، ءتالىمدى اۋىل شارۋاشىلىق مامانى بالتاش تۇرسىنباەۆتىڭ وي-پىكىرى دۇرىس بايلام بولعاندىعىن ۋاقىت دالەلدەپ شىقتى.

بالتاشتىڭ ءوزىنىڭ دە بولجامپاز ەكەندىگىنە كوزىم جەتكەن ءبىر ءىستى بايانداي كەتكىم كەلىپ وتىر. قاۋىپسىزدىك كەڭەسىندە قىسقا مەرزىم عانا حاتشى بولىپ، ودان تۇركيا ەلىنە اسىپ كەتۋى، ودان دا تۇراق تاپپاي، «ۆيتسە-پرەمەر» بولىپ، ونىڭ ەلگە كەلگەن تۇسى بولاتىن. ول كەزدە جانىبەك ءسالىمۇلى اۋىل شارۋاشىلىعى ءمينيسترى-تۇعىن.

قازاقستاندا اۋىل شارۋاشىلىعى ىسىنە الاڭ بولىپ جۇرەتىن بالتاش سول جىلعى كۇزدەگى ەگىن جيناۋ قارقىنىنا كوڭىلى تولماي قالدى. سونىڭ سەبەبىن سۇراعاندا: «بيىل ەگىس تاناپتارىندا شەگىرتكە قاپتاپ، ەگىندى جيناتپايدى!»– دەگەنى بار.

قوڭىر كۇزدىڭ جايما-شۋاق كۇندەرىنىڭ ءبىرى ەدى. بىلاي قاراعاندا، اۋا رايى دا جامان ەمەس، ەگىن دە بىتىك شىققان ءتارىزدى. بالتاشتىڭ بۇل باتىل سوزىنە قۇلاق اسپاق تۇگىلى، ءتىپتى قارسى شىققاندار دا تابىلدى.

– سەبەبى، – دەدى بالتاش، – ءبىراز جىلداردان بەرى شەگىرتكەلەردىڭ ۇياسى جەرگە كومىلمەي، اشىق قالدى. دەمەك، ەگىستىككە قولدانىلاتىن اگروتەحنيكالىك شارالار جۇزەگە اسپادى. اسسا دا، كوپ جەردە شالا-شارپى جۇرگىزىلدى. ەندى سول ۇياشىقتاردا ءتىرى قالعان شەگىرتكە تۇقىمدارى بيىل قاپتاپ كەتۋ قاۋپى بار.

اقىرى بالتاشتىڭ ايتقانى كەلدى. بىراق ءبىزدى سەندىرگەنىمەن، ۇكىمەتتى سەندىرە المادى. اۋىل شارۋاشىلىق ماماندارى مۇنى جاي ءسوز دەپ قابىلدادى.

ءبىر كۇنى استاناداعى مەن تۇراتىن «قىزىل اۋىلدا» شەگىرتكە قاپتادى دا كەتتى. ءتىپتى ەسىك-تەرەزەمىزدى قانشا قىمتاساق تا، تەسىگىن تاۋىپ، ەسەبىن تاۋىپ، ءۇيدىڭ ىشىنە دەيىن كىرىپ الدى. بالتاشقا زۆونداپ:

– ايتقانىڭ ايداي كەلدى! ەندى نە ىستەيمىز؟! – دەدىم.

– مەن ايتارىمدى – ايتقانمىن. ەندى مەنەن نەسىن سۇرايسىڭ؟! – دەپ ىركىلدى بالتاش.

بالتاشتىڭ وسىنداي باتىل ويلارى جۇزەگە اسسا، باسقانى قايدام، ەلىمىزدىڭ اۋىل شارۋاشىلىق سالاسىنا، ءسوز جوق، يگىلىك اكەلگەن بولار ەدى، بىراق امال نە، ءبىزدىڭ بيلىكتە بالتاشتىڭ باتىل ويلارىن قابىلدار قۇلىق بولمادى. ءتىپتى ونى مەملەكەتىمىزدىڭ ماڭىزدى سالالارىندا بەلسەنە ەڭبەك ەتىپ، كۇش-جىگەرىن شىڭداۋعا، شىنداپ كەلگەندە، مۇمكىندىك بەرمەدى. بيلىك تىزگىنىن بەرمەگەنى ءوز الدىنا، قايتا ونى قۋعىنداپ، جايباراقات جۇمىس ىستەۋىنە دە كەدەرگى بولدى. ءار سوزىنەن ساياسات ىزدەپ، ساعىن سىندىرۋعا دەيىن باردى.

«ساعىن سىندىرعان» ەمەي نەمەنە، ءمىنىپ جۇرگەن كولىگىنە الدەبىرەۋلەر تاپا-تال تۇستە وت قويىپ، ويرانىن شىعاردى. ونىمەن قويماي، «ەندى بيلىككە قارسى ءسوز ايتاتىن بولساڭ، وزىڭە دە قاۋىپ ءتونىپ تۇر» دەگەندەي سوزدەرمەن بايلانىسقا شىققان بەلسەندىلەر دە بولعان.

الايدا مۇنداي قاسكۇنەمدىككە بالتاش مولدابايۇلى مويىعان جوق. قايتا كەۋدەسىن تىك ۇستاپ، باياعى جايساڭ، جايدارى قالپىنان ءبىر تايمادى. دەنساۋلىعى سىر بەرگەن ساتتە دە ەشكىمگە شاعىمدانباي، جالبارىنباي، سىرتتان كومەك سۇراماي، دوس-جورالارىنىڭ دەمەۋىمەن شەتەلگە بارىپ، ەم الىپ قايتتى.

شەتەل دەمەكشى، كورشى رەسەي ەلىنىڭ قازاعى دا، ورىسى دا بالتاشتى قاتتى قادىرلەيدى ەكەن. ءتىپتى رەسەي مەملەكەتىنىڭ كەيبىر بيلىك يەگەرلەرى بالتاشتى رەسەيگە شاقىرىپ، ءىس-تاجريبەسىن بولىسكىسى كەلگەن تۇستارى دا بولعان. بىراق تۋعان قازاقستانىن قاتتى قاستەرلەيتىن بىربەتكەي بالتاش بۇل ۇسىنىستاردىڭ بىردە-بىرەۋىنە مويىن ۇسىنعان ەمەس. قازاقتىڭ «وزگە ەلدە سۇلتان بولعانشا، ءوز ەلىڭدە ۇلتان بول» دەگەن ۇلاعاتتى ءسوزىن ول بالا جاسىنان بويىنا ءسىڭىرىپ ءوستى. بالتاشتى قاراپايىم حالىقتىڭ سىرتىندا ءتىپتى بيلىك تىزگىنىن ۇستاعان ارىپتەستەرىنىڭ ءوزى قادىر تۇتىپ، جىلى لەبىزدەرىن اياماعانىنا تالاي كۋا بولدىم. اسىرەسە ارىپتەستەرىنىڭ ىشىندە قازاققا «ءوزىمىزدىڭ سەرگەي» اتانعان سەرگەي كۋلاگيننىڭ دە، بالتاشتىڭ ۇلكەن ۇيىمداستىرۋشى، ىسكەر ازامات ەكەندىگىن تالاي ايتقان يگى تىلەكتەرىن ەستىگەنىم بار. تىزگىندەس ارىپتەستەرىنىڭ ءبىرىن-ءبىرى باعالاپ، ءادىل ءسوزىن ايتۋى بىزدە ءالى دە سيرەك قوي.

ال الەمنىڭ ايگىلى ءبىر اقىنى ولجاس سۇلەيمەنوۆ پەن قازاقتىڭ ايگىلى ءبىر باتىرى توقتار اۋباكىروۆتەر اراسىنداعى دوستىق، سىيلاستىق قارىم-قاتىناستارىنا تالاي ءتانتى بولدىم. ءتىپتى اسا ەشكىمگە جىلى ءسوزىن قيا بەرمەيتىن، ماقتاۋعا ساراڭ، سارابدال جازۋشى ءابدىجامىل نۇرپەيىسوۆتىڭ ءوزى بالتاشتىڭ 70 جىلدىق مەرەيتويىندا تەبىرەنە سويلەپ، يگى تىلەك ايتقان-دى. مۇنداي ءبىرتۋار ادامداردىڭ ەشكىمنىڭ اتاق-مانسابىنا مالدانباي، ادال ءسوزىن ايتاتىنىن اركىم-اق بىلەدى. سول سەبەپتەن قاراپايىم حالىق وسىنداي ءۋاجدى ءسوز ايتاتىن اسىل ازاماتتارىنا ارقاشان يەك ارتاتىنى اقيقات.

مەن ءۇشىن بالتاش تۇرسىنباەۆتىڭ قوستاناي وبلىسىندا اكىم بولعان كەزەڭدەرى ەرەكشە ەستە قالدى. ارينە، قوستاناي – تورعاي ءوڭىرىن اركەز باسقارعان ءبىراز اكىمدەردىڭ ەل ەسىندە قالعانى بەلگىلى. سولاردىڭ ىشىندە ج. قوساباەۆ، ك.ۋكين، ت.قادامباەۆ، اسىرەسە ومىرزاق شوكەەۆتىڭ كەزىندەگى كەلەلى ىستەردىڭ ءىزى ءالى كۇنگە سايراپ جاتىر. بۇل كۇندە وبلىس تىزگىنىن ۇستاپ وتىرعان ارحيمەد مۇحامبەتوۆتىڭ دە اتقارىپ جاتقان اۋقىمدى جۇمىستارى مەن يگىلىكتى ىستەرىنە ەل-جۇرت رازىلىعىن ءبىلدىرىپ وتىر. جاقىندا عانا وبلىس جۇرتشىلىعى وسى وڭىردە وتكەن اۋقىمدى شارالاردىڭ ەڭ ۇلكەنى – قوستانايدا ورناتىلعان ابىز-باتىر شاقشاق قوشقارۇلى جانىبەككە ورناتىلعان الىپ ەسكەرتكىشكە كۋا بولدى.

ال سول يگىلىكتى شارانىڭ سوڭىنان ىلە-شالا جالعاسقان 1916 جىلعى ۇلت-ازاتتىق كوتەرىلىسىنىڭ قولباسشىسى – كەيكى كوكەمبايۇلىنا ارنايى سالىنعان كەسەنەنىڭ ورنى ەرەكشە بولدى.

ارقالىق پەن تورعاي تاس جولىنىڭ بويىندا بوي كوتەرگەن ىرگەلى كەسەنەگە، ۇستىمىزدەگى جىلى تۋعان ەلگە ورالعان كەيكى باتىردىڭ عازيز باسى جەر قوينىنا تاپسىرىلدى. وسى ەكى شارانىڭ كەڭ اۋقىمدا وتۋىنە وبلىس باسشىلارى مەن ەلدەگى باتىر بابا ۇرپاقتارىنىڭ ەرەسەن ەڭبەگى بولعانىن قاداپ ايتۋىمىز كەرەك.

بالتاش تۇرسىنباەۆتىڭ قوستاناي وبلىسىن باسقارعان كەزىندەگى باتىل ويلارى ءبىزدى دە ءتانتى ەتۋشى ەدى. الدىمەن قازاقتىڭ تالانتتى جازۋشىسى بەيىمبەت ءمايليننىڭ عاسىر تويىن رەسپۋبليكا كولەمىندە جوعارى دەڭگەيدە وتكىزگەن وبلىس اكىمىنىڭ بولاشاق ويلارى مەن ماقساتتارى ۇلت ءۇشىن دە، جۇرت ءۇشىن دە اسا باعالى ەدى.

بەيىمبەت تويىنىڭ ءبىر ناتيجەسى – سول تۇستا ۇلى جازۋشىعا ەسكەرتكىش ورناتىلىپ قالدى. سودان كەيىنگى الاش ارىستارىنا ارنالعان الاڭ دا بالتاشتىڭ ءىس-جوسپارىندا جۇرەتىن.

باسقا وبلىستاردا قولعا الىنىپ، ءوز ايماعىنداعى اتاقتى ادامداردىڭ، اقىن-جازۋشىلاردىڭ جەكە ەڭبەكتەرىن شىعارىپ، شىعارمالارىن كەڭىنەن ناسيحاتتاۋ ءۇشىن، «توبىل-تورعاي» كىتاپحاناسىن قالىپتاستىرۋ مىندەتى تۇرعان ەدى. بۇل يگى باستاما باسقا وبلىستاردا الدەقاشان جۇيەسىن تاپقان. ايتسە دە، تالانتتارى ءدۇيىم دۇنيەگە تانىمال بۇل وڭىردە وسى ءبىر يگىلىكتى ءىس ءالى كۇنگە دەيىن ءوز باستاۋىن تاپپاي-اق قويدى. وسىعان وراي ايتار ءبىر ءسوز ويعا ورالىپ وتىر.

ەرتەدە بەيىمبەتتىڭ ءوزى بەلسەنە ۇيىمداستىرعان جالشى اۋىلىن بالتاش باسشىلىق جاساپ تۇرعان تۇستا جازۋشىنىڭ مەرەيتويىنا وراي قايتادان قالپىنا كەلتىرىپ، جاپ-جاڭا ەلدى مەكەندى سىيعا تارتقان ەدى. ءسويتىپ، بالتاش جالشى اۋىلىن وركەندەتۋدى كوزدەگەن بەيىمبەتتىڭ ارمانىن جۇزەگە اسىردى. الايدا ارتىنشا بالتاش ورنىنان كەتكەننەن كەيىن، سول اۋىلدىڭ ساۋ-تامتىعى دا قالمادى...

قوستاناي وبلىسى – استىقتى ءوڭىر. بالتاش وسى ولكەدەگى ەگىن مەن مال شارۋاشىلىعى باعىتىنداعى باستى نىسانداردى ىرىلەندىرۋگە كوپ كۇش جۇمساعان ەدى. اتتەڭ نە كەرەك، جەمە-جەمگە كەلگەندە، كوپتەگەن يگىلىكتى ىستەردىڭ جۇزەگە اسۋىنا مۇمكىندىك بەرمەي، جەدەل تۇردە ورنىنان ىعىستىرىلدى. بالتاش قوستانايدان كەتكەننەن كەيىن، «انا قىزىمنان مىنا قىزىم سوراقى» دەگەننىڭ كەبى كەلىپ، وبلىس تىزگىنىن ۇستاعانداردىڭ كوبى شەتىنەن جەمقور، جالماۋىز بولىپ، «تۇيەنى تۇگىمەن، ماشينانى جۇگىمەن جۇتتى». ەل-جۇرت جاريا بولعانداردىڭ سانىن عانا بىلسە بىلەر. ال كوزگە كورىنبەي جۇرگەن «كولدەنەڭدى كوك اتتىلار» قانشاما دەرسىڭ؟

وسىنداي كەزدە ەل-جۇرت، قاراپايىم حالىق بالتاش سىندى اسىلدارىن ىزدەيدى. ۇلتتىڭ ءتىلىن، ءبىلىمىن، ءدىنىن اسپەتتەيتىن، ءداستۇرىن دارىپتەيتىن، سالتىن ساقتايتىن ساليقالى باسشىلاردى ىزدەيدى، سولاردى ساعىنادى. توبىل–تورعاي ءوڭىرى ءالى كۇنگە دەيىن يلياس وماروۆ، وزبەكالى جانىبەكوۆ، ساقان قۇسايىنوۆ، ەركىن اۋەلبەكوۆ سىندى ەرلەرىن اڭىز قىلىپ ايتىپ، اۋىزدارىنان تاستامايدى. سونىڭ باستى سەبەبى – ولاردىڭ ەلىن-جەرىن سۇيگەن، ۇلتىنا قىزمەت ەتكەن ۇمىتىلماس ىستەرى بولسا كەرەك. ولاردىڭ ءوڭىر جۇرتىنا جاساعان يگىلىكتى ىستەرى ۇرپاقتان-ۇرپاققا ۇلگى بولىپ، الداعى عاسىرلاردىڭ ەنشىسىنە ەنبەك.

ەندەشە ءبىزدىڭ بالتاشتىڭ دا ءوز حالقىنا قالدىرعان ءىزى، ىسكەرلىگى، وتانعا، قوعامعا دەگەن بەلسەندىلىگى، ءتىپتى بىرەگەي بىربەتكەيلىگى مەن باتىلدىعى – قازاق ەلىنىڭ التىن قازىناسىنا اينالىپ، رۋحاني بايلىعىمىز بولا بەرەرى حاق.

سەرىك تۇرعىنبەكۇلى، اقىن

«DAT» گازەتى

“The Qazaq Times”