بۇۇ باس اسسامبلەياسىنىڭ كوميتەتى  23 مەملەكەتتىڭ قولداۋىمەن سەمەي سىناق پوليگونى بويىنشا حالىقارالىق ىنتىماقتاستىق جانە قىزمەتىن ۇيلەستىرۋ تۋرالى شەشىمدى ماقۇلدادى، دەپ حابارلايدى 24.kz.

قر سىرتقى ىستەر مينيسترلىگىنىڭ مالىمەتىنشە، رەزوليۋتسيانى بۇۇ باس اسسامبلەياسىنىڭ جالپى وتىرىسىندا قابىلداۋ جەلتوقسان ايىنا جوسپارلانعان. بۇل 1997 جىلدان بەرى بۇۇ باس اسسامبلەياسىنىڭ سەمەي ايماعىنا ارنالعان توعىزىنشى رەزوليۋتسياسى.

قۇجات زارداپ شەككەن حالىقتى ەمدەۋ مەن قىزمەت كورسەتۋدىڭ ارنايى باعدارلامالارى مەن جوبالارىن ازىرلەۋ جانە جۇزەگە اسىرۋدا، سونداي-اق سەمەي ايماعىندا ەكونوميكالىق ءوسۋ مەن تۇراقتى دامۋدى قامتاماسىز ەتۋ بويىنشا حالىقارالىق قاۋىمداستىقتى  قازاقستانعا كومەك بەرۋگە شاقىرادى.

سونداي-اق، قۇجاتتا سەمەي ءوڭىرىنىڭ قالپىنا كەلتىرۋ مەن دامىتۋعا رەسۋرستار بولەتىن قازاقستان ۇكىمەتىنىڭ ماڭىزدى ءرولى تۋرالى ايتىلعان.

“The Qazaq Times”