بىرىككەن ۇلتتار ۇيىمىنىڭ قاۋىپسىزدىك كەڭەسى ۇيىمنىڭ بەيبىتشىلىكتى ساقتاۋشى اسكەري كۇشتەرىنىڭ سانىن ارتتىرۋعا شەشىم قابىلداپ وتىر. بۇل شەشىم اسىرەسە ورتالىق افريكا رەسپۋبليكاسىنداعى بەيبىتشىلىكتى ساقتاۋشى كۇشتەرگە قاراتا جۇزەگە اسىرىلماق. بۇل تۋرالى «شينلاڭ» اقپاراتتىق سايتى حابارلادى.

بۇۇ قاۋىپسىزدىك كەڭەسىنىڭ وتىرىسىنان كەيىن، ورتالىق افريكا رەسپۋبليكاسىنداعى بەيبىتشىلىكتى قورعايتىن ارنايى اسكەرلەر سانىن تاعى 900 اداممەن تولىقتىرۋعا شەشىم قابىلدادى. ناتيجەسىندە، وار ەلىندەگى بۇۇ-نىڭ جىبەرگەن بەيبىتشىلىكتى ساقتاۋشى قارۋلى كۇشتەرىنىڭ سانى 11 مىڭ 650 ادامعا جەتپەك.

ورتالىق افريكا رەسپۋبليكاسىنداعى بەيبىتشىلىكتى قورعاۋ كۇشتەرىنىڭ سانىن ارتتىرۋدى بۇۇ باس حاتشىسى انتونيۋ گۋتەرريش ورتاعا قويعان. سەبەبى، ەلدەگى قونىس اۋدارۋشىلار 600 مىڭ ادامنان اسىپ، وزگە مەملەكەتتەرگە جارتى ملن حالىق باس ساۋعالاپ كەتكەن. ەلدەگى قارۋلى قاقتىعىستار سانى جىلداعىدان ەسەلەپ ارتا تۇسكەن. وسى قاقتىعىستاردى توقتاتۋ جانە بولدىرماۋ ءۇشىن ەلدەگى بۇۇ جاساقتارىن كوبەيتۋ بىردەن ءبىر شەشىم دەپ تاپتى.

“The Qazaq Times”