اقش مەملەكەتتىك حاتشىسى رەكس تيللەرسون ءبىر كۇن بۇرىن ميانماعا باردى جانە ونداعى ازاماتتىق ۇيىمدار مەن اسكەري لاۋازىمدى تۇلعالارىمەن كەزدەستى. بۇل تۋرالى «People» باسىلىمىنىڭ رەسمي سايتى جازدى.

رەكس تيللەرسون كەزدەسۋ بارىسىندا اراكاندالىق مۇسىلمانداردىڭ قۇقىقتارىنىڭ بۇزىلۋى جانە وندا بولعان وقيعانى تىم ايانىشتى جاعداي دەپ باعالادى، ءارى اتالعان ىسكە تەرگەۋ جۇرگىزىلۋىن تالاپ ەتتى.

ميانما باسشىسى اۋن سان سۋ چيمەن بىرگە وتكىزگەن ءباسپاسوز ءماجىلىسى كەزىندە تيللەرسون: «اراكاندادا بولعان قاندى قىرعىن كەزىندە ميانما قارۋلى كۇشتەرى جاعدايدى تولىق مەڭگەرە المادى. ءتارتىپ ورناتۋشى كۇشتەردىڭ كەرىسىنشە ادام قۇقىقتارىنا قايشى ارەكەتتەرى تۋرالى دالەلدەر بار. وسى جاعدايعا بايلانىستى جانە ايەلدەر مەن بالالاردى قامتىعان نەشە ون مىڭداعان حالىقتىڭ باس ساۋعالاپ ەلدەن كەتۋى قۇراما شتاتتى الاڭداتىپ وتىر»، – دەگەن كوزقاراسىن ءبىلدىردى.

اقش مەملەكەتتىك حاتشىسى ميانما مۇسىلماندارىنىڭ قىرعىنشىلىققا ۇشىراۋىنا قاتىستى تەرگەۋدى تالاپ ەتتى، الايدا وسى ىسكە بايلانىستى ميانماعا ەكونوميكالىق قىسىم جاساۋ شەشىمىن قۇراما شتاتتىڭ قولدامايتىنىن دا ايتىپ ءوتتى.

“The Qazaq Times”