ليۆان پرەزيدەنتى ساۋد ارابياسىن پرەمەر-ءمينيسترىن زاڭسىز ۇستاپ وتىر دەپ ايىپتادى

ليۆان پرەزيدەنتى ميشەل اۋن ساۋد ارابياسىن  ءوز ەلىنىڭ پرەمەر-ءمينيسترى سااد ءحاريريدى زاڭسىز ۇستاپ وتىر دەپ ايىپتادى. 4 قاراشا كۇنى ليۆاننىڭ پرەمەر-ءمينيسترى قىزمەتىن اتقارىپ كەلگەن سااد حاريري ريادتاعى ساپارى كەزىندە ءوزىنىڭ وتستاۆكاعا كەتەتىنىن حابارلاپ، سونان بەرى ەلگە ورالماعان. قۇزىرەتتى تۇلعانىڭ ءوز لاۋازىمىنان باس تارتۋ تۋرالى شەشىمىن شەت ەلدە ءجۇرىپ سىرتتاي حابارلاۋىنا بولمايتىنىن ايتقان پرەزيدەنت ساۋد ارابياسى سااد ءحاريريدىڭ ەركىندىگىن شەكتەپ وتىر دەپ ەسەپتەيدى. 

ليۆان پرەزيدەنتى ميشەل اۋن: "پرەمەر-ءمينيستردىڭ 12 كۇن بويى ەلگە ورالماۋى كۇدىكتى. ساۋد ارابياسى ونى زورلىقپەن ۇستاپ وتىرعان بولۋى مۇمكىن. بۇل ۆەنا كونۆەنتسياسىنىڭ ادام قۇقىقتارى جونىندەگى باپتارىنا قايشى", - دەگەن مالىمدەمە جاسادى. ءوز كەزەگىندە ساۋد ارابياسى تاعىلعان ايىپتاردان تولىقتاي باس تارتىپ، سااد ءحاريريدىڭ ەركىنەن تىس ەشقانداي ارەكەت بولماعانىن ايتتى.

سااد حاريري ءوزىنىڭ تۆيتتەردەگى پاراقشاسى ارقىلى ليۆان پرەزيدەنتىنە جاقىندا ورالاتىنىن جانە ءحالى جاقسى ەكەنىن جەتكىزدى. فرانتسيا پرەزيدەنتى ەمانۋەل ماكرون ليۆاننىڭ بۇرىنعى پرەمەر-ءمينيسترى مەن ونىڭ وتباسىن ءوز ەلىنە شاقىردى. فرانتسيا بيلىگىنىڭ ءباسپاسوز قىزمەتى مەملەكەت باسشىسى سااد حاريريمەن جانە ساۋد ارابياسىنىڭ ءامىرى مۇحاممەد بين سالمانمەن تەلەفون ارقىلى سويلەسكەننەن كەيىن، جاقىن كۇندەرى ليۆاننىڭ ريادتان ورالماعان پرەمەرى پاريجگە كەلەتىنى تۋرالى اقپارات تاراتتى.

سااد حاريري جەكسەنبى كۇنى ريادتاعى تەلەارنالاردىڭ بىرىنە بەرگەن سۇحباتىندا، ليۆاننان ءوز ءومىرىن ساقتاۋ ءۇشىن كەتكەنىن ايتىپ، ساۋد ارابياسىندا ەركىن تۇرىپ جاتقانىن ايتقان. ونىڭ ءسوزىن پرەمەردىڭ پارتيالاس سەرىگى دە راستاپ، ونىڭ تۇتقىنعا الىنباعانىن جاريالادى.

“The Qazaq Times”