قاراعاندى مەكتەپتەرىندە كادر تاپشى. جالاقى ماردىمسىز بولعاندىقتان، جاس ماماندار  ۇزاق تۇراقتامايدى. تىعىرىقتان شىعۋ ءۇشىن ءبىلىم مەكەمەلەرى زەينەتكەرلەردىڭ كومەگىنە جۇگىنۋگە ءماجبۇر، دەپ حابارلايدى استانا تەلەارناسى.

تەلەارنانىڭ مالىمەتىنشە، قازىردىڭ وزىندە قالادا ءارتۇرلى پاندەر مەن باستاۋىش سىنىپتارعا 400-گە تارتا مۇعالىم جەتىسپەيدى. پەداگوگتار ۇكىمەتتەن كادر تاپشىلىعىن جويۋ ءۇشىن جاس ۇستازداردىڭ جالاقىسىن كوتەرىپ، الەۋمەتتىك جەڭىلدىكتەر جاساۋدى سۇرايدى.

قاراعاندىداعى №101 مەكتەپ-ليتسەيىندە جۇمىس ىستەپ قۇرمەتتى دەمالىسقا شىققان ولگا ەم ارتىنشا مەكتەپتەن شاقىرتۋ العانىن ايتادى. ءبىراز ويلانىپ، جارتى كۇن جۇمىس ىستەۋگە كەلىسكەن. قازىر ول قالاداعى ليتسەيلەردىڭ بىرىندە حيميا پانىنەن ساباق بەرەدى.

"العاشىندا ۇيدە دەمالام دەپ ويلادىم. بىراق مەكتەپكە شاقىرعان سوڭ، وتباسىممەن اقىلداسىپ، اقىرى جۇمىسقا شىقتىم. ءبىر جاعىنان اقشا دا ارتىق بولمايدى. ەندى جاستار كەلگىسى كەلمەسە، ءبىز سەكىلدى زەينەتكەرلەر كومەكتەسپەسەك، بالالاردى كىم وقىتادى؟", - دەيدى زەينەتكەر.

اتالعان مەكتەپكە ماتەماتيكا، حيميا، بيولوگيا، گەوگرافيا جانە ورىس ءتىلى پاندەرى مەن باستاۋىش سىنىپ مۇعالىمدەرى قاجەت. سوندىقتان باسشىلىق بىرنەشە زەينەتكەردى جۇمىسقا العان. ولار پەداگوگيكالىق قۇرامنىڭ 15 پايىزىنا جۋىق. ماسەلە ماردىمسىز جالاقىدا، دەگەن مەكتەپ ديرەكتورى، كوللەدج بىتىرگەن جاس مامانعا تيەسىلى جالاقى 30 مىڭ تەڭگەدەن ءسال-اق جوعارى ەكەنىن ايتادى. ال ۋنيۆەرسيتەت تامامداعان مۇعالىمنىڭ ايلىعى 50 مىڭ تەڭگەدەن اسادى.

"تۇرمىستىق جاعدايلارىنا اقشانىڭ جەتىسپەۋشىلىگىنە بايلانىستى جىل باسىنان بەرى 3 مامان كەتتى. بىرەۋ گەوگرافيا ءپانى مۇعالىمى، ەكەۋى باستاۋىش سىنىپ مۇعالىمى. ەگەر ءبىز جىلىنا 5-6 جاس مامان الاتىن بولساق، ونىڭ ىشىندە تۇراقتاپ قالاتىنى 50 پايىزى", - دەيدى قاراعاندى قالاسى №101 مەكتەپ-ليتسەيىنىڭ ديرەكتورى راحات قازتەۆ.

ايتا كەتەيىك، كادر تاپشىلىعى بايقالىپ وتىرعان ءوڭىر تەك قاراعاندى عانا ەمەس. مىسالى وسى جىلدىڭ باسىندا الماتى وبلىسىنىڭ اۋىلدارىنىڭ بىرىندە جوعارى ءبىلىمى جوق مۇعاىمدەردىڭ ساباق بەرىپ جۇگەنىنە قاتىستى داۋ تۋىنداعان. مەكتەپ ديرەكتورى بولسا پەداگوگتار جەتىسپەۋشىلىگىنەن وسىنداي قادامدار جاسالىپ وتىرعانىن ايتقان.

بۇدان بولەك استانا قالاسىنىڭ اكىمى اسەت يسەكەشەۆ تە مەكتەپتەردە مۇعالىمدەردىڭ جەتىسپەيتىنىن مالىمدەگەن ەدى.

“The Qazaq Times”