يراكتىڭ جوعارعى سوتى تاۋەلسىزدىك الۋدى كوزدەگەن كۇردىستان اۆتونومياسىنا قاتىستى ءوز ۇكىمىن شىعاردى. ونىڭ شەشىمىندە يراك كونستيتۋتسياسىنا سايكەس، مەملەكەت قۇرامىنا كىرەتىن كەز كەلگەن ءوڭىردىڭ ورتالىق ۇكىمەتتەن بولىنۋىنە تىيىم سالىناتىندىعى ايتىلعان. قۇجاتتا "يراكتىڭ تۇتاستىعىن قولدايتىن سوت ۇكىمى قايتا قاراۋعا نە وزگەرتۋگە جاتپايدى", -دەلىنگەن. بۇل تۋرالى ءال-جازيرا اقپاراتتىق اگەنتتىگى جازدى. 

يراكتىڭ پرەمەر-ءمينيسترى حايدەر ءال-ابادي بارلىق تاراپتاردى سوت شەشىمىن قاتاڭ ساقتاۋعا شاقىردى.  25 قىركۇيەك كۇنى رەفەرەندۋم وتكىزىپ، يراكتان ىرگەسىن اۋلاق سالۋدى ماقسات تۇتقان كۇردىستان اۆتونومياسى نەبارى 1 ايدىڭ ىشىندە ءوزى يەلەنىپ وتىرعان تەرريتوريانىڭ  40 پايىزىن جوعالتتى. 2014 جىلى يراك اسكەرى "يسلام مەملەكەتى" لاڭكەستىك ۇيىمىنىڭ كۇشتەرىنەن شەگىنىپ، تەررورشىلار قولىندا قالدىرىپ كەتكەن مۇنايعا باي كيركۋك قالاسىن بوساتىپ العان كۇردتەر رەفەرەندۋمعا بايلانىستى داۋدان كەيىن اتالعان شاھاردان تاعى دا قول ءۇزىپ قالدى. يراك اسكەرى از كۇننىڭ ىشىندە كۇشپەن كوپ اۋماقتى ءوزىنىڭ قول استىنا قايتارىپ الدى.

رەفەرەندۋمعا قاتىسقان حالىقتىڭ 92 پايىزى تاۋەلسىزدىكتى قولداپ داۋىس بەرگەنىمەن، ورتالىق ۇكىمەتپەن ورتاق كەلىسىمگە كەلە الماۋ جانە شەت مەملەكەتتەردىڭ "بۇل جاعداي يراكتىڭ "يسلام مەملەكەتى" لاڭكەستىك ۇيىمىنا قارسى كۇرەسىنە زاردابىن تيگىزەدى" دەگەن قىسىمىنان كەيىن كۇردىستان اۆتونومياسىنىڭ قادامدارى باسەڭدەپ قالدى.

كۇردىستاننىڭ وڭىرلىك ۇكىمەتى 2018 جىلعا ارنالعان بيۋدجەتتە ايماققا بولىنەتىن قارجىنىڭ قىسقارعانىنا نارازىلىق تانىتىپ، ورتالىق ۇكىمەتكە ارىز جولدادى. وسىعان دەيىن يراك  كونستيتۋتسيانىڭ 3 ءبولىم، 121-بابىن بۇزعانى ءۇشىن كۇردىستاننىڭ كەلەر جىلعا ارنالعان بيۋدجەتىن 17 پايىزدان 12,6 پايىزعا دەيىن قىسقارتۋ تۋرالى شەشىم قابىلداعان بولاتىن. بۇل - كۇردىستاننىڭ مەملەكەتتەن ءبولىنۋ تۋرالى يدەياسى ءۇشىن العان جازاسى بولماق.

“The Qazaq Times”