وتكەن جىلدىڭ 11 جەلتوقسانىندا قىرعىزستاندا رەفەرەندۋم ارقىلى وسى ۋاقىتقا دەيىن جۇمىس ىستەپ كەلگەن كونستيتۋتسيا وزگەرتىلگەن بولاتىن. بۇل وزگەرتۋلەر 2017 جىلدىڭ  جەلتوقسان ايىنىڭ 1-نەن باستاپ ءوز كۇشىنە ەنەتىن بولادى. وسىعان بايلانىستى بۇگىن ءبىز قىرعىز ەلىنىڭ جاڭا اتا زاڭىنداعى وزگەرتۋلەر مەن تولىقتىرۋلارعا قىسقاشا توقتالۋدى ءجون كوردىك.

بۇعان دەيىن 2010-2011 جىلدارداعى اتا زاڭ بويىنشا، قىرعىز پرەزيدەنتى بيلىك باسىندا بولىپ جاتقان بارلىق وزگەرىستەر مەن جاڭا باستامالاردىڭ قوزعاۋشى كۇشى بولعان. ال جاڭا كونستيتۋتسيا بويىنشا، پرەزيدەنتتەن بۇل مىندەتتەر الىنىپ تاستالعان. بۇدان بىلاي پرەزيدەنت زاڭ شىعارۋشى ورگان مەن اتقارۋشى بيلىك ىشىندەگى ءتۇرلى داۋلى ماسەلەلەرگە ارالاسا المايدى. بىراق، ەسەسىنە وزگەرتىلگەن اتا زاڭ بويىنشا، پرەمەر-مينيستر بيلىگى كۇشەيتىلگەن. ول وسىدان بىلاي اۋدان اكىمدەرىن ءوزى تاعايىنداپ، ءوزى الىپ تاستاي الادى. بۇعان دەيىن ول اۋدان اكىمدەرىن ايماق كەڭەستەرىنىڭ ۇسىنىسى بويىنشا عانا تاعايىنداي الاتىن بولعان. بۇدان بولەك پرەمەر ەل ۇكىمەتىندەگى كەز كەلگەن ءمينيستردى پرەزيدەنت قارسى بولعان كۇننىڭ وزىندە ورنىنان بوساتا الادى.

جالپى جاڭا كونستيتۋتسيا بويىنشا، قىرعىز پرالامانتىندە دە بىرقاتار وزگەرىستەر بولادى. مىسالى بۇعان دەيىن قانداي دا ءبىر فراكتسيانىڭ كواليتسيادان شىعۋىنا ءبىر عانا ادامنىڭ شەشىمى جەتكىلىكتى بولاتىن بولسا، وسىدان كەيىن كەز كەلگەن فراكتسيانىڭ پارلامەنتتەن كەتۋىنە فراكتسيا مۇشەلەرىنىڭ ۇشتەن ەكى بولىگىنىڭ كەلىسىمى كەرەك بولادى.  بۇدان بولەك بۇعان دەيىن ەل پارلامەنتى قابىلداعان زاڭعا (ول قاتە زاڭ بولسا دا) پرەزيدەنت قول قويۋعا مىندەتتى بولسا، بۇدان بىلاي پرالامەنت قابىلداعان زاڭدى پرەمەر-مينيستر دۇرىس ەمەس دەپ شەشسە، پرەزيدەنت ونى قايتا قاراۋعا جىبەرۋگە قۇقىلى.

“The Qazaq Times”