دونالد ترامپ قىتايدىڭ جاڭا مەرزىمگە قايتا سايلانعان باسشىسى شي جينپيڭمەن تەلەفون ارقىلى سويلەسىپ، ونى جۋىرداعى جەڭىسىمەن قۇتتىقتادى. ءوزىنىڭ تۆيتتەر پاراقشاسىنا: "ونى قىتايدىڭ پاتشاسى دەپ اتاۋعا بولادى" دەپ جازعان امەريكا باسشىسى قوس تاراپ سولتۇستىك كورەيا ماسەلەسى مەن ەكىجاقتى ساۋدا تۋرالى اڭگىمە وربىتكەنىن جەتكىزدى. بۇل تۋرالى ۆۆس اقپاراتتىق اگەنتتىگ جازدى. 

دونالد ترامپتان كەيىن اراعا ءبىر ساعات سالىپ، قىتاي باسشىسىن سولتۇستىك كورەيانىڭ پرەزيدەنتى كيم جوڭ ۋن قۇتتىقتاعان.

اقش پەن قىتايدىڭ مەملەكەت باسشىلارى وسىعان دەيىن شىلدە ايىندا وتكەن G20 سامميتىندە كەزدەسكەن بولاتىن. كەلەسى ايدا امەريكا پرەزيدەنتى قىتايعا رەسمي ساپارمەن بارادى.

قىتايدىڭ مەملەكەتتىك باسىلىمدارى تەلەفون ارقىلى اڭگىمە بارىسىندا شي اقش پەن قىتاي قارىم-قاتىناسىنىڭ نىعايۋىنا مۇددەلى ەكەندىگىن ءبىلدىردى دەپ جازدى. ال دونالد ترامپ Fox Business Network-قا بەرگەن سۇحباتىندا قىتاي باسشىسىن "وتە جاقسى ادام" دەپ اتاپ، ەكەۋىنىڭ اراسىندا جاقسى قارىم-قاتىناستار ورناعانىن جەتكىزگەن.

قىتاي اقش-تان كەيىنگى الەمدەگى ەكىنشى ەڭ ۇلكەن ەكونوميكا سانالادى. ول -امەريكانىڭ ەڭ ءىرى ساۋدا سەرىكتەسى. سوعان قاراماستان، قوس تاراپتىڭ قارىم-قاتىناسى سوڭعى كەزدەرى سولتۇستىك كورەيا مەن بەيجىڭ اراسىنداعى بايلانىس پەن قىتاي جانە شىعىس ازياداعى امەريكانىڭ وداقتاستارى اراسىنداعى تەرريتوريالىق داۋلارعا بايلانىستى كۇردەلەنگەن ەدى.

“The Qazaq Times”