ەندى قازاقستاندىقتاردىڭ سمارتفون كومەگىمەن بازارلاردا تولەم جاساۋعا مۇمكىندىگى بار. بۇگىن قازكوممەرتسبانك پەن Visa كومپانياسى Visa تەحنولوگياسىنىڭ موبيلدىك قوسىمشاسى نەگىزىندە يننوۆاتسيالىق Homebank Pay تولەم سەرۆيسى ىسكە قوسىلعانىن حابارلادى. اتالعان تولەم سەرۆيسى تۇتىنۋشىلارعا QR كودتى سۋرەتكە ءتۇسىرۋ ارقىلى تولەم جۇرگىزۋگە مۇمكىندىك بەرەدى.
ءتىپتى ساۋدا ورىندارى مەن قىزمەت كورسەتەتىن كاسىپورىندار اتالعان تولەم قىزمەتىن پايدالانعان جاعدايدا قىمبات تۇراتىن POS-تەرمينالداردى ساتىپ الماسا دا بولادى. ياعني ولار دا QR-تەحنولوگياسى ارقىلى كونتاكتىسىز تولەم قابىلداۋعا مۇمكىندىك الادى. وسى تۇرعىدان العاندا جاڭا جۇيە كاسىپكەرلەر ءۇشىن ءتيىمدى بولعالى تۇر.
ال مۇنداي جاڭا تولەم جۇيەسىن ىسكە قوسۋ ءۇشىن تۇتىنۋشى سمارتفونىنا Homebank موبيلدىك قوسىمشاسىن جۇكتەپ الىپ، سونداعى نۇسقاۋلىقتارمەن تانىسسا بولعانى. سودان كەيىن تۇتىنۋشى سمارتفوننىڭ كامەراسى ارقىلى ساتۋشىنىڭ (ينتەرنەت-سايتتاعى نەمەسە پوليگرافيالىق سۋرەت رەتىندە بەينەلەنگەن) QR-كودىن ءتۇسىرىپ الۋ قاجەت، سول ساتتە جۇيە كوممەرسانتتىڭ بارلىق دەرەكتەرىن اۆتوماتتى تۇردە تانىپ، تولەم بىردەن جۇرگىزىلەدى.
Qazkom بۇل جۇيەنى ىسكە قوسپاس بۇرىن ساۋالناما جۇرگىزگەن. ساۋالناما قورىتىندىسى بويىنشا بازارلارداعى ساتۋشىلاردىڭ كوپشىلىگى POS-تەرمينالداردىڭ قىمبات بولۋىنا بايلانىستى قولما-قول ەمەس تولەم قابىلداۋعا دايىن ەمەس ەكەندەرىن ايتقان. الايدا ولار ونى الماستىرا الاتىن قوسىمشا قۇرىلعى پايدا بولعان جاعدايدا قولما-قول ەمەس تولەمدى قابىلداۋعا دايىن ەكەندەرىن جەتكىزگەن.
بازاردا دا Homebank Pay تەحنولوگياسىن پايدالانىپ، QR كود ارقىلى تولەم جاساۋعا مۇمكىندىك بولادى. فوتو: Qazkom
وسىلايشا Qazkom-نىڭ باسقارۋشى ديرەكتورى نۇرلان جاعىپاروۆ جاڭا جۇيەنىڭ قالاي جۇمىس ىستەيتىنىن تانىستىردى.
"ساتۋشى QR-كودتى كەز كەلگەن قاعازعا نەمەسە كارتونعا ورنالاستىرىپ قويسا بولعانى. قىزمەتتى تاكسي جۇرگىزۋشىلەرى مەن بازارداعى ساتۋشىلار دا قولدانا الادى. ءتىپتى تويعا بارعان قوناقتاردىڭ قالتاسىندا قولما-قول اقشاسى بولماسا، جاي عانا QR-كودتى سكانەرلەپ، جاس جۇبايلارعا اقشا اۋدارۋىنا بولادى", - دەدى ول.
ال تولەم جاسالعاننان كەيىن تۇتىنۋشىعا جانە ساتۋشىعا تولەمنىڭ جاسالعانى تۋرالى Homebank قوسىمشاسى ارقىلى SMS كەلەدى.
Homebank Pay تەحنولوگياسىن قولدانۋدىڭ تاعى ءبىر ءتاسىلى - تويعا QR كود ارقىلى اقشا اۋدارۋ. فوتو: Qazkom
بۇدان بولەك جوبانى تانىستىرۋ كەزىندە نۇرلان جاعىپاروۆ كەيبىر ەلدەردە QR-تولەم جۇيەلەرى باسقا تەحنولوگيالاردى ىعىستىرىپ جاتقانىن اتاپ ءوتتى.
ونىڭ سوزىنشە، جۇيە وسى ايدىڭ اياعىنا دەيىن ونلاين دۇكەندەر ءۇشىن 100 پايىز ىسكە قوسىلاتىن بولادى. ال قاراشا ايىندا الماتى جانە استانا قالالارىنداعى ساۋدا ورىندارىندا ىسكە قوسىلا باستايدى. 2018 جىلى باسقا ايماقتار بىرتىندەپ قوسىلادى.
جوبانىڭ تانىسىتىرىلىمىنا قاتىسقان حالىق بانكتىڭ باسقارما توراعاسى ءۇمىت شاياحمەتوۆا اتالعان سەرۆيس كاسىپكەرلەر تاراپىنان ەشبىر ينۆەستيتسيانى تالاپ ەتەپەيتىنىن جانە كولەڭكەلى قولما-قول اقشا اينالىمىنىڭ ازايۋىنا مۇمكىندىك بەرەتىنىن اتاپ ءوتتى.
"كاسىپكەرلەردىڭ كوپشىلىگى POS-تەرمينالدار نەمەسە ينتەرنەت ارقىلى تولەم جۇرگىزە المايتىندارىن ايتادى. مەنىڭشە مۇنىڭ سەبەبى باسقا: ولاردا اشىقتىق بولامايدى نەمەسە سالىق تولەۋگە، ناقتى اينالىمىنىڭ قانشا ەكەنىن كورسەتۋگە قىزىعۋشىلىق تانىتپايدى", - دەدى شاياحمەتوۆا.
ول سونداي-اق، قىزمەتتىڭ جاڭا ءتۇرىن الداعى ۋاقىتتا حالىق بانك كليەنتتەرى دە پايدالانا الاتىنىن ايتتى.
ال "بۇل جۇيەگە ساتۋشىلار، كاسىپكەرلەر قالاي قوسىلادى؟" دەگەن سۇراققا كەلەر بولساق، ولار Qazkom-مەن ساۋدا ەكۆايرينگى بويىنشا (بانك كارتاسىن ۇستاۋشىلارعا قىزمەت كورسەتۋ - رەد.) كەلىسىم-شارت جاساۋ كەرەك. ول بويىنشا ءوتىنىشتى بانككە بارماي-اق، بانك سايتى ارقىلى بەرۋگە بولادى.
كەلىسىمشارت جاسالعاننان كەيىن Qazkom-نىڭ ەكۆايرينگ سەرىكتەستەرى جاڭا Homebank Pay قىزمەتىنە اۆتوماتتى تۇردە قوسىلادى، بانككە بارۋدىڭ قاجەتى بولمايدى.
ال وسى قىزمەتتى تۇتىنۋشىلار نەمەسە تاۋار ساتىپ الۋشىلار QR-كود ارقىلى ەسەپ جۇرگىزۋ ءۇشىن جوعارىدا ايتىپ وتكەندەي Qazkom-نىڭ Visa كارتاسىن جانە سمارتفونىندا (Android نەمەسە iOS) Homebank قوسىمشاسىنىڭ سوڭعى نۇسقاسىن پايدالانسا جەتكىلىكتى.
بۇدان بولەك، نۇرلان جاعىپاروۆ QR تەحنولوگياسى ارقىلى تولەم جاساۋ كەزىندە كوميسسيا الىناتىنىن ايتتى. ونىڭ سوزىنشە، كوميسسيا كولەمى ۇسىنىلاتىن قىزمەت تۇرىنە بايلانىستى بولادى. مولشەرلەمەنى بەلگىلەۋدە كورشى ەلدەردەگى جانە وسى تەحنولوگيانى بەلسەندى قولداناتىن ەلدەردەگى تاجىريبە ەسەپكە الىنادى. ەۋروپا، امەريكا سىندى ەلدەردەگى بالامالار پايدالانىلماق.
استانادا قالعان جاڭاوزەندىك جۇمىسسىزدار "قازمۇنايگاز" كەلىسسوزدى توقتاتىپ تاستادى دەيدى
فبر پەنتاگوننىڭ قۇپيا قۇجاتتارىنىڭ جاريالانۋىنا قاتىسى بار كۇدىكتىنى قامادى
بىشكەكتە كاسىپكەرلەر جاڭا سالىق ەرەجەلەرىنە قارسى اكتسيا وتكىزدى
موڭعوليا استاناسىندا جاپپاي نارازىلىق شەرۋلەرى ءوتتى
ەكىباستۇزدا جىلۋ جەلىسىندەگى اقاۋعا "ستانتسيا قىزمەتكەرىنىڭ قاتەلىگى" سەبەپ بولعانى ايتىلدى
