قر ءسىم الماتىداعى ءبولىمى. فوتو: QT

بۇگىن، 24 قازان كۇنى قر سىرتقى ىستەر مينيسترلىگىنىڭ الماتىداعى بولىمىندە قىتايدىڭ شىنجاڭ جەرىندە قاماۋعا الىنعان نەمەسە «ساياسي ۇيرەنۋگە» جىبەرىلگەن قازاق ازاماتتارىنىڭ قازاقستانداعى تۋىستارىن، ولاردىڭ ارىز-شاعىمىن قابىلداۋ بولدى.

شەكارانىڭ ارعى بەتىندە قاماۋعا الىنعان نەمەسە «ساياسي ۇيرەنۋگە» جىبەرىلگەن تۋىستارى بار قازاقستان رەسپۋبليكاسىنىڭ وتىزدان اسا ازاماتى الماتىداعى سىرتقى ىستەر مينيسترلىگىنىڭ عيماراتى الدىنا جينالدى. قۇزىرلى ورىن جينالعانداردان 15 ادامدى جەكە-جەكە قابىلداپ، قىتايعا كەتىپ ورالا الماي وتىرعان نەمەسە سوندا تۇراتىن تۋىستارىنىڭ ۇكىمەت جاعىنان قىسىم كورگەن ءىسى تۋرالى ءمان-جاي سۇراسقان.

الايدا قابىلداۋعا باق وكىلدەرى قاتىستىرىلمادى. قۇزىرلى ورىننىڭ تابالدىرىعىن اتتاي العان ادامداردان سۇراپ بىلۋىمىزشە، قر ءسىم قىتايدا قاماۋعا الىنعان نەمەسە قاندايدا ءبىر قىسىمدار كورىپ جاتقان ادامداردىڭ تىكەلەي تۋىستارىنىڭ ارىزىن جەكە-جەكە قابىلدايتىن بولعان. ازاماتتاردىڭ ارىز-شاعىمى نەگىزىندە سىرتقى ىستەر مينيسترلىگى قىتايدىڭ قازاقستانداعى ەلشىلىكتەرىنە جانە قحر ءسىم-نەن اتالعان ءىستى انىقتاپ بەرۋىن تالاپ ەتپەك.

ارىز بەرۋشىلەردىڭ سوزىنە قاراعاندا شىنجاڭ جەرىندە قىسىمعا ۇشىراعاندار اراسىندا قازاقستان ازاماتتارى دا بولۋى مۇمكىن دەپ وتىر. بىراق ول تۋرالى انىق دەرەك جوق. الداعى ۋاقىتتا بۇل ادامداردىڭ تۋىستارىنان شاعىمداردى قابىلداپ الىپ، قىتاي تارابىنىڭ تەكسەرىپ-انىقتاۋىنا جولداماق.

سىرتقى ىستەر مينيسترلىگىنىڭ قابىلداۋىنا كىرگەن ارىز بەرۋشىلەر. فوتو: QT.

ارىز بەرۋشىلەردىڭ ءبىرى، قازاقستان ازاماتى جۇماعازى دالەيۇلىنىڭ ايەلى قىزىرحان ورازبەكقىزى الىدە قحر ازاماتى. قىتايدان زەينەتاقى الاتىن قىزىرحاندى شىنجاڭعا شاقىرتىپ العان. بارعان كۇنى ۇيالى تەلەفونىن الىپ كەتىپ تەكسەرەدى. كەيىن ءوزىن «ساياسي ۇيرەنۋ» دەپ قاماققا العان. جۇماعازى ايەلىنىڭ قاشان بوساتىلاتىنىن بىلە الماي وتىرعانىن ايتادى.

وسىعان ۇقساس جانە وزگە دە جاعدايلاردا قىسىم كورگەن قازاق ازاماتتارىنىڭ تۋىستارىنان جەتكەن ارىز-تىلەكتى تىڭداعان قر ءسىم الداعى ۋاقىتتا قىتاي ەلشىلىكتەرى ارقىلى جاۋاپ الىپ بەرەدى دەگەن ۇمىتتەمىز.

“The Qazaq Times”