موڭعوليا ەلىندە ءبىر قانداسىمىز سول ەلدىڭ قۇرىلىس جانە قالا قۇرىلىسى مينيسترىنە ۇسىنىلدى. مينيستر اتانعان بادەلحان قابدىسىلامۇلى بۇعان دەيىن بايان-ولگەي ايماعىنىڭ اكىمى، پارلامەنت مۇشەسى، ونەركاسىپ مينيسترلىگىنىڭ ۆيتسە-ءمينيسترى قاتارلى لاۋازىمدى قىزمەتتەردى اتقارعان. بادەلحان قابدىسىلامۇلى موڭعوليادا 21 جىلدان كەيىن مينيستر اتانىپ وتىرعان قازاق ازاماتى. بۇل تۋرالى موڭعوليانىڭ قازاق ءتىلدى اقپاراتتىق پورتالى «كاZNEWS.MN» حابارلادى.
1962 جىلدان بەرى موڭعوليادا بەس بىردەي قازاق ازاماتى مينيستر بولعان.
1. موڭعوليا قازاقتارى اراسىنان العاشقى بولىپ 1962-1965 جىلى، 1968-1982 جىلدارى موڭعول حالىق رەسپۋبليكاسىنىڭ قۇرىلىس، قۇرىلىس ماتەريالدارى ونەركاسىپ ءمينيسترى قىزمەتىن تىلەيحان ورىنۇلى اتقارعان. قۇرىلىس سالاسىندا سىڭىرگەن ەڭبەگى، وزىندىك قولتاڭباسى قالعان. ۇلانباتىر قالاسىنداعى قۇرىلىس پوليتەحنيكالىق كوللەدجى تىلەيحان ورىنۇلىنىڭ اتىنا بەرىلگەن.
2. 1980-1987 جىلدارى گەولوگيا، تاۋ-كەن ءمينيسترى، 1987-1991 جىلدارى تابيعات قورعاۋ ءمينيسترى قىزمەتىن ماۋلەت ۇتقانۇلى اتقارعان. نالايحان شاحتاسىنىڭ دامۋىنا زور ۇلەس قوسىپ جاڭا تەحنيكا، تەحنولوگيالىق جاڭارتۋ ەنگىزگەنى ءۇشىن «مەملەكەتتىك سىيلىق يەگەرى» اتانعان.
3. موڭعوليانىڭ توتاريتارلىق جۇيەدەن نارىقتىق جۇيەگە اۋىسۋ كەزەڭى ياعني 1991-1992 جىلدارى موڭعوليانىڭ مينيسترلەر كەڭەسى توراعاسىنىڭ ورىنباسارى قىزمەتىن زاردىحان قيناياتۇلى اتقارعان.
4. 1992-1996 جىلدارى موڭعوليانىڭ كولىك كوممۋنيكاتسيا جانە ينفراقۇرىلىم ءمينيسترى قىزمەتىن ساندالحان رازدىقۇلى اتقارعان. موڭعوليا پارلامەنتىنە بايان-ولگيدەن ەكى مارتە سايلانعان.
ال وسى ءىزدى جالعاپ، بەسىنشى رەت موڭعول جۇرتىندا مينيسترلىك قىزمەتكە تاعايىندالعان بادەلحان قابدىسىلامۇلى. 17 قازان كۇنى ەل پرەزيدەنتى ح.باتتۋلگا ب. قابدىسىلامۇلىن قابىلداپ، وعان اتالعان سالانىڭ اقساپ تۇرعان جۇمىستارىن سەنىپ تاپسىردى.
ايتا كەتەيىك، بۇعان دەيىن موڭعول جۇرتىندا 9 قازاق قانداسىمىز ۆيتسە-مينيستر لاۋازىمىندا بولعان.
الەمنىڭ ءار تۇكپىرىندە دە قازاقتىڭ ماقتانىشى مەن ابرويى ورتاق. ال سول ابىروي-بەدەلىن اسقاقتاتىپ جۇرگەن ازاماتتاردىڭ ءار قادامىنا ساتتىلىك تىلەيمىز!
وتانعا ورالعان قانداس بەيىمدەلۋى نەمەسە قانداستار مەن قازاقستانداعى ميگرانتتاردى اقپاراتتىق قولداۋ جانە الەۋمەتتىك بەيىمدەۋدىڭ مەديا-ستراتەگياسى
استانادا قالعان جاڭاوزەندىك جۇمىسسىزدار "قازمۇنايگاز" كەلىسسوزدى توقتاتىپ تاستادى دەيدى
فبر پەنتاگوننىڭ قۇپيا قۇجاتتارىنىڭ جاريالانۋىنا قاتىسى بار كۇدىكتىنى قامادى
مەشىن جىلدىڭ قارا ولەڭى
موڭعوليا استاناسىندا جاپپاي نارازىلىق شەرۋلەرى ءوتتى