قىرعىزستاندا پرەزيدەنتتىك سايلاۋ جاقىنداعان سايىن ەلدەگى ساياسي جاعداي ۋشىعا تۇسۋدە. وش وبلىسىندا ومىربەك بابانوۆ جاقتاستارىن ۇرىپ-سوعۋ فاكتىلەرى تىركەلگەن. بۇعان قوسا وش قالاسىنىڭ اكىمشىلىگى حالىقتى بابانوۆپەن كەزدەسۋگە بارماۋعا شاقىرىپ، اگيتاتسيالىق جۇمىستار جۇرگىزىلۋى ءتيىس الاڭدى ءتۇرلى سىلتاۋلارمەن بەرمەي قويعان. بۇگىن ءبىز قىرعىز ەلىندە پرەزيدەنت سايلاۋى قارساڭىندا بولىپ جاتقان وسى جانە وزگە دە وقيعالارعا قىسقاشا توقتالۋدى ءجون كوردىك.

قازان ايىنىڭ 3-ءى كۇنى قىرعىزستاندىق «نتس» تەلەارناسى وش وبلىسىندا سوققىعا جىعىلعان ومىربەك بابانوۆتىڭ جاقتاستارىنىڭ ءبىرى دۋربەك ءالىمجانوۆ ەسىمدى ازامات جايىندا بەينەماتەريال كورسەتكەن. وندا ءالىمجانوۆ قازان ايىنىڭ 1-ءى كۇنى بەلگىسىز 4 ادامنىڭ ءوزىن قارا-سۋ اۋدانىنا قاراستى پاپان اۋىلىنىڭ شەتىنە اپارىپ، ومىربەك بابانوۆتان 100 مىڭ دوللار كولەمىندە قارجى العاندىعىن مويىنداتۋ ءۇشىن ۇرىپ-سوققاندىعى جايىندا ايتقان. كەيىننەن ءالىمجانوۆتىڭ ەشنارسەنى مويىندامايتىنىنا كوزدەرى جەتكەن ولار، وعان پرەزيدەنت سايلاۋى وتكەنشە وش قالاسىندا بولماۋعا كەڭەس بەرگەن.

سوققىعا جىعىلعان دۋربەك ءالىمجانوۆ.

ال وش وبلىستىق ىشكى ىستەر دەپارتامەنتى ءباسپاسوز قىزمەتى اتالمىش وقيعاعا بايلانىستى باق وكىلدەرىنىڭ ساۋالىنا ماردىمدى جاۋاپ بەرمەگەن. ولاردىڭ سوزىنشە، دۋربەك ءالىمجانوۆ وسى ۋاقىتقا دەيىن بىرەۋدەن ءجابىر كورگەنى جايىندا قۇقىق قورعاۋ ورگاندارىنا شاعىم تۇسىرمەگەن. الماتمىش وقيعا قىركۇيەكتىڭ 28-ءى كۇنى وش قالاسىندا وتكەن ومىربەك بانانوۆتىڭ حالىقپەن كەزدەسۋىنەن كەيىن ەكى كۇننەن سوڭ بولعانىن ەسكەرسە، وندا ونىڭ نە سەبەپتى ءتيىستى ورگاندارعا شاعىمدانباعانىن تۇسىنۋگە بولادى. ويتكەنى ءدال وسى ءالىمجانوۆ باستاعان ومىربەك بابانوۆ جاقتاستارىنىڭ اگيتاتسيالىق جۇمىستارى جۇرگىزۋىنە قىركۇيەكتىڭ 28-ءى كۇنى جەرگىلىكتى بيلىك ءتۇرلى كەدەرگىلەر جاساعان. مىسالى: بابانوۆتىڭ حالىقپەن كەزدەسۋى ءوتۋى ءتيىس «ءامىر تەمىر» اۋدانىنداعى الاڭدى شاھار اكىمشىلىگى ۇيىمداستىرۋشىلارعا بەرمەي قويعان. بىراق بابانوۆتىڭ سايلاۋ الدى شتابى كەزدەسۋدى ءدال وسى اۋداننىڭ باسقا جەرىندە وتكىزگەن. مىڭنان استام ادام قاتىسقان كەزدەسۋدە بابانوۆ: «مەن پرەزيدەنت بولعان كۇنى ەلدە ادامنىڭ ۇلتىنا ەمەس، ونىڭ تاجىريبەسىنە قاراپ جۇمىسقا الاتىن بولادى. قىرعىز، وزبەك، قازاق، تاجىك بارلىعى تەڭ دارەجەدە بولادى. ءبىزدىڭ ەلىمىزدىڭ بايلىعى – كوپ ۇلتتىلىعىندا. وسى كەزدەسۋدى ۇيىمدستىرۋ بارىسىندا ەل بيلىگى كوپتەگەن كەدەرگىلەر جاسادى. ادامداردى قورقىتتى، ۇركىتتى، ۇردى-سوقتى، بۇلاي كەتە بەرسە ارى قاراي نە بولماق ؟ «تىزەرلەپ ءومىر سۇرگەنشە، تىك تۇرىپ ولگەنىمىز ارتىق» بارلىعىمىز بىرىگىپ ەلدى وزگەرتەيىك» - دەگەن.

وش قالالىق اكىمشىلىگىنىڭ الدىنا ومىربەك بابانوۆقا قارسى قارسىلىق اكتسياسىنا شىققان حالىق.

وسى كەزدەسۋدەن كەيىن الەۋمەتتىك جەلىلەردە ومىربەك بابانوۆتىڭ سويلەگەن سوزدەرىن مۇلدە باسقا ماعىنادا كورسەتەتىن ۆيدەوروليكتەر تارالىپ كەتكەن. وندا روليكتى جاساۋشىلار بابانوۆتىڭ «تىزەرلەپ ءومىر سۇرگەنشە، تىك تۇرىپ ولگەنىمىز ارتىق. ەگەر دە قانداي دا ءبىر پوليتسيا قىزمەتكەرى وزبەك ۇلتىنا تيسەتىن بولسا، وندا ول جۇمىستان قۋىلاتىن بولادى» - دەگەن كونتەكستتەگى شىن مانىندە بولماعان دۇنيەنى حالىق اراسىنا تاراتىپ جىبەرگەن. بابانوۆ جاقتاستارىنىڭ ويىنشا، بۇنىڭ بارلىعى ومىربەك بابانوۆتى قىرعىز حالقى الدىندا وزبەكشىل ازامات رەتىندە كورسەتۋ ماقساتىندا جاسالعان ۆيدەولار. مۇنىمەن قاتار قازاننىڭ 3-ءى كۇنى وش قالاسىندا 50-گە جۋىق ادام ومىربەك بابانوۆقا قارسى قارسىلىق اكتسياسىن ۇيىمداستىرعان. بىراق ءبىر قىزىعى ولارعا جەرگىلىكتى اكىمشىلىك ەشقانداي كەدەرگى جاساماعان. بۇل سوڭعى ەكى-ءۇش كۇندە بولعان قىرعىز پرەزيدەنت سايلاۋىنىڭ كورىنىسى عانا. ال سايلاۋ وتەتىن قازان ايىنىڭ ون بەسىنە دەيىن ءالى ون كۇن بارىن ەسكەرسە، وندا قىرعىز ەلىنەن وسىعان ۇقساس ءالى تالاي جاڭالىق كەلەتىنى انىق.

“The Qazaq Times”