شىمكەنت اكىمدىگى  "3-ەنەرگوورتالىق" اق-عا مەملەكەتتىك اكتسيالارىنىڭ 18 پايىزىن ساتتى.

شىمكەنت اكىمىنىڭ ورىنباسارى بەيسەنبەك جانبوسىنوۆتىڭ ايتۋىنشا، قالا اكىمدىگى قارىز كوپ بولعاندىقتان وسىنداي قادامعا بارعان. ويتكەنى حالىققا جىلۋ جەتكىزەتىن جانە جىلۋ تولەمىن جيناۋمەن اينالىساتىن "قۋات جىلۋ ورتالىق-33"  اتتى كوممۋنالدىق كاسىپورنى جىلۋ ەلەكتر ستانتسياسى-3-كە 1,5 ملرد تەڭگە قارىز بولعان.

"ماسەلە مەملەكەتتىك اكتسيالاردى ساتۋ بويىنشا شەشىلدى. اكتسيالاردىڭ 18%-ى "ز-ەنەرگوورتالىق" اق باقىلاۋ پاكەتىنە يە ينۆەستورعا 1,8 ملرد تەڭگەگە ساتىلدى (ينۆەستور ۇلەسى - 76%). بۇدان بۇرىن جەس اكتسيالارىنداعى مەملەكەتتىك مەنشىك 24%-دى قۇراعان", - دەدى بەيسەنبەك جانبوسىنوۆ.

ونىڭ سوزىنشە، قارىز سوماسى تەك بيىلعى جىلى عانا ءوسىپ وتىرعان جوق. وتكەن جىلعى جىلۋ ماۋسىمى كەزىندە جەس-3 الدىنداعى قارىز 987 ملن تەڭگە بولعان.

"جىلۋ ەنەرگياسى ءوندىرىلىپ جاتىر، الايدا اپات سالدارىنان تۇتىنۋشىنى قاجەتتى جىلۋمەن قامتاماسىز ەتۋ مۇمكىن بولمايدى. بۇل قارىزدىڭ كوبەيۋىنە سەبەپ. قىركۇيەكتىڭ 25-ىندە تاڭەرتەڭ تولەم جاسالدى، ەندى كەشكە قارجى "قازترانسگاز" اق ەسەپشوتىنا تۇسەدى دەپ سەنەمىز. 1 قازاننان باستاپ ءبىز جەس-ءتى اشۋدى جوسپارلاپ وتىرمىز", - دەدى اكىم ورىنباسارى.

جەس-3 شىمكەنتتەگى ەڭ ءىرى جىلۋ جەتكىزۋشى ستانتسيا. وسى جىلدىڭ 1 ساۋىرىندە "قازترانسگاز-ايماق" اق الدىنداعى قارىزىن وتەي الماعاندىقتان كاسىپورىنداعى گاز وشىرىلگەن بولاتىن.

"قارىز ماسەلەسى جىلۋمەن قامتاماسىز ەتەتىن جانە ونى وندىرەتىن كاسىپورىندار اراسىنداعى، ياعني جەس-3 پەن ءبىزدىڭ جىلۋ جەلىلەردىڭ اراسىنداعى تاريفتەر رەتتەلمەگەندىكتەن تۋىنداعان بولاتىن. ەندى تاريفتەر رەتتەلدى، شىعىن بولمايدى. كەلەسى ماۋسىمدا مۇنداي جاعداي بولمايدى. حالىق ءۇشىن تاريفتەر سول كۇيىندە قالادى", - دەگەن ەدى قالالىق تۇرعىن ءۇي كوممۋنالدىق شارۋاشىلىعى ءبولىمىنىڭ باسشىسى نۇرلان بەكتۇرسىنوۆ.

“The Qazaq Times”