وزبەكستان مەن قازاقستان رەسپۋبليكاسىنىڭ ساۋدا-ەكونوميكالىق ىنتىماقتاستىعى اياسىندا وڭتۇستىك قازاقستان وبلىسىندا تۇرمىستىق تەحنيكا ياعني گاز پليتاسىن شىعاراتىن تسەح ىسكە قوسىلدى. بۇل تۋرالى وڭتۇستىك قازاقستان وبلىسى اكىمدىگىنىڭ ءباسپاسوز قىزمەتى حابارلادى. 

جىلىنا 50 مىڭ دانا گاز پليتاسىن قۇراستىرۋعا  قاۋقارلى جوبانىڭ قۇنى – 102 ملن تەڭگەنى قۇرايدى. قازىرگى تاڭدا كاسىپورىندا قوندىرعىلاردى ورناتۋ جۇمىستارى اياقتالىپ، ىسكە قوسىلعان.

«Artel Manufacturing» جشس ديرەكتورى رامزيتدين حيكماتوۆتىڭ سوزىنشە، كومپانيا جەكە قارجىسىنا قوندىرعىلاردى ساتىپ الىپ، ورناتىپ شىققان. مۇندا 30 ادام تۇراقتى جۇمىسپەن قامتىلاتىن بولادى. شىعارىلعان ءونىمدى ىشكى نارىققا ساۋدالاۋ جوسپارلانىپ وتىر.

ء"بىزدىڭ زاۋىتتا دايىندالعان گاز پليتالارىنىڭ ساپاسى شەتەلدىك ونىمنەن ەش كەم بولمايدى. ءارى باعاسى دا قازىرگى نارىقتاعىدان تومەن بولادى»،-  دەدى ول.

ايتا كەتەيىك، قر پرەزيدەنتى نۇرسۇلتان نازارباەۆ قىركۇيەكتىڭ 16-سى كۇنى تاشكەنتكە رەسمي ءىس-ساپارمەن بارىپ، وزبەكستان پرەزيدەنتى شاۆكات ميرزيەەۆپەن كەزدەسكەن ەدى. ەكى ەل باسشىلارى كەزدەسۋ بارىسىندا اسكەري-تەحنيكالىق، ترانسپورتتىق، ەنەرگەتيكالىق، سۋ شارۋاشىلىعى جانە قارجى سالالارى بويىنشا 10 قۇجاتقا قول قويىپ، قازاقستان مەن وزبەكستان قارىم-قاتىناسىنىڭ جاڭا قادامدارعا اياق باسقانىن دالەلدەدى. ءتىپتى وسى ۋاقىتقا دەيىن كوپتەگەن شەتەلدىك ساراپشىلار مەن باتىس مەملەكەتتەرىنىڭ "ورتالىق ازيادا قازاقستان مەن وزبەكستان كوشباسشى بولۋعا باقتالاس بولىپ كەلەدى" دەگەن پىكىرىن جوققا شىعاردى.

“The Qazaq Times”