لوندون ترانسپورت جۇيەسىنىڭ جەتەكشىلىگى Uber ونلاين تاكسي قىزمەتىنىڭ ليتسەنزياسىن قايتارىپ الدى. ەندى قازان ايىنان باستاپ اتالعان كومپانيا ۇلىبريتانيا استاناسىندا جولاۋشىلاردى تاسىمالداۋ قىزمەتىن توقتاتادى. بۇل تۋرالى قالا باسقارماسى ءوزىنىڭ Twitter پاراقشاسىندا مالىمدەدى، دەپ جازدى ربك.

لوندونداعى ترانسپورت جۇيەسى وپەراتورى كومپانياعا "30 قىركۇيەكتەن كەيىن ليتسەنزيا مەرزىمىن سوزبايتىنىن" ەسكەرتكەن. تاكسي قىزمەتىنە بەرىلگەن ليتسەنزيا مەرزىمى ءدال سول كۇنى اياقتالادى. وپەراتوردىڭ مالىمەتىنشە،  Uber تاكسوموتورلى قىزمەتتەردە جاريالاناتىن تالاپتارعا جاۋاپ بەرمەيدى، سونداي-اق، قىلمىستىق وقيعالار كەزىندە ەسكەرتۋلەر جاساۋدا ولقىلىق تانىتادى، مەديتسينا جانە جۇرگىزۋشىلەردىڭ سوتتالماعانى تۋرالى انىقتامالارىنا قاتىستى اقپاراتتى اشىق جاريالامايدى، ءتىپتى كومپانيا قىزمەتىنە تىيىم سالىنعان نەمەسە شەكتەلگەن ورىندارداعى قۇقىق قورعاۋ ورگاندارىنىڭ قىزمەتكەرلەرى مەن قالا بيلىگىن الداپ كەتۋگە بولاتىن Greyball جۇيەسىن پايدالانادى ەكەن.

ەندى Uber-ءدىڭ 21 كۇن ىشىندە شاعىم ءتۇسىرۋ قۇقىعى بار.  Reuters-تىڭ جازۋىنشا، اپپەلياتسيا قارالعان كۇننىڭ وزىندە كومپانيا قىزمەتىنىڭ ودان ارى جالعاسۋى ەكىتالاي.  Bloomberg مالىمەتىنە سەنسەك، لوندوندا اتالعان كومپانيانىڭ قىزمەتىن شامامەن 3,5 ملن كليەنت پەن 40 مىڭ جۇرگىزۋشى پايدالانادى.

سوڭعى ۋاقىتتا Uber-گە قاتىستى ماسەلەلەر كوبەيگەن. مىسالى اقش كومپانياعا قاتىستى بىرنەشە تەرگەۋ جۇمىستارىن جۇرگىزىپ جاتىر. سان-فرانتسيسكو پروكۋراتۋراسىنىڭ مالىمەتىنشە، بۇل ەلدەگى ونلاين تاكسي قىزمەتى دە Greyball جۇيەسىن پايدالانعان.

Uber قىزمەتىنە قاتىستى شاعىمدار قازاقستاندا دا بايقالىپ ءجۇر. بىزدە جەرگىلىكتى بيلىك وكىلدەرى ارىزدانباعانمەن، الەۋمەتتىك جەلى قولدانۋشىلارى ونلاين-تاكسي قىزمەتىنىڭ باعاسى سوڭعى كەزدە قىمباتتاپ كەتەتىنىن ايتادى.

“The Qazaq Times”