رەسەي «يسلام مەملەكەتى» لاڭكەستىك ۇيىمىنىڭ ءسۇريا مەن يراكتا جەڭىلىس تابۋى ورتالىق ازيادا تۇراقسىزدىق ورناتۋى مۇمكىن دەپ الاڭدايدى.

رەسەي فەدەراتسياسى «يسلام مەملەكەتىنىڭ» ءسۇريا مەن يراكتا جەڭىلۋىنەن كەيىن ۇيىم قۇرامىندا بولعان ورتالىق ازيا مەملەكەتتەرىنىڭ ازاماتتارى ەلدەرىنە قايتۋى ءوڭىر تىنىشتىعىن بۇزۋى مۇمكىن دەپ الاڭدايدى. سوڭعى مالىمەتتەر بويىنشا، «يسلام مەملەكەتى» مەن «فرونت ان-نۋسر» لاڭكەستىك ۇيىمدارىنىڭ قۇرامىندا 2012 جىلدان بەرى 4 مىڭنان استام ورتالىق ازيا ەلدەرىنىڭ ازاماتتارى بولعان. بىراق اقش رەسمي ماسكەۋدىڭ بۇل ماسەلەگە بايلانىستى الاڭداۋشىلىعىن اسىرا سىلتەۋ دەپ ەسەپتەيدى.

اقش سىرتقى ساياساتىنداعى رەسەي بويىنشا ساراپشىسى ستيۆەن بلەنكتىڭ سوزىنشە، ورتالىق ازيادان شىققان ءسۇريا مەن يراك اۋماعىندا سوعىسىپ جۇرگەن سودىرلاردىڭ باسىم كوپشىلىگى «يسلام مەملەكەتى» سىندى ۇيىمداردىڭ قۇرامىنا رەسەي ارقىلى كەلگەن. ولاردىڭ باسىم كوپشىلىگى رەسەيدە ميگرانت بولىپ جۇمىس ىستەگەندەر جانە ولار رف اۋماعىندا جەرگىلىكتى بيلىك وكىلدەرى مەن ورىس حالقىنان قاتتى قىسىم كورگەندەر. بۇل ازاماتتاردىڭ رەسەي ارقىلى ورتالىق ازياعا قايتىپ ورالۋلارى ەكى تالاي.

ال اقش-تىڭ ورتالىق ازيا بويىنشا ساراپشىسى نوي تاككەردىڭ ويىنشا، ءسۇريا مەن يراكتاعى تەررورلىق ۇيىمداردىڭ جەڭىلىس تابۋى ورتالىق ازيا تىنىشتىعىن بۇزۋى ابدەن مۇمكىن. سەبەبى «يسلام مەملەكەتى» لاڭكەستىك ۇيىمىنىڭ فاناتتارى بۇعان دەيىندە بىشكەك، الماتى، دۋشانبە سىندى قالالاردا تەررورلىق شابۋىلدار جاساعان. ەگەر دە تاياۋ شىعىستاعى سوعىس وسى قالپىندا اياقتالاتىن بولسا، وندا لاڭكەستىك ۇيىمداردىڭ قۇرامىندا بولعان ازاماتتار ەلدەرىنە قايتىپ ورالاتىندارى ءسوزسىز. بۇل جوعارىدا اتالعان قالالاردا تەررورلىق شابۋىلداردىڭ بولۋ قاۋپىن ەكى ەسەگە ارتتىرادى. قازىردىڭ وزىندە ءسۇريا مەن يراكتا سوعىسىپ جۇرگەن ورتالىق ازيا مەملەكەتتەرى ازاماتتارىنىڭ ءبىر بولىگى تۇركياداعى ءوز ەلدەرىنىڭ ەلشىلىكتەرىنە بارىپ، ءوز ەرىكتەرىمەن بەرىلۋدە. ال تاعى ءبىر بولىگى تەررورلىق ۇيىمداردىڭ قۇرامىندا ءالى كۇنگە دەيىن سوعىسىپ ءجۇر.

“The Qazaq Times”