قازاقستاندىق ءۇش ادۆوكات ەقىۇ-عا (وبسە) شاعىم ءتۇسىردى – دەپ حابارلايدى ca-news.org اقپارات كوزى.

پولشانىڭ ۆارشاۆا قالاسىندا ءوتىپ جاتقان ەقىۇ كونفەرەنتسياسىندا قازاقستاننان بارعان اسەل توقاەۆا، سەرگەي سيزينتسەۆ جانە دانيار كانافين قر ادىلەت مينيسترلىگى دايىنداعان «ادۆوكاتتىق جانە قۇقىقتىق كومەك» تۋرالى زاڭدى قابىلداماۋ كەرەكتىگىن ايتقان. دانيار كانافيننىڭ سوزىنشە، اتالمىش زاڭ جوباسى قازاقستان رەسپۋبليكاسىنداعى تاۋەلسىز ادۆوكاتتاردىڭ قازىرگە دەيىن جۇمىس ىستەپ كەلگەن ۇيىمداستىرۋ مەن قارجى باسقارۋ قىزمەتىنە كەدەرگى جاسايدى.

ال اسەل توقاەۆانىڭ ايتۋىنشا، قازىرگى تاڭدا قازاقستاندا ادۆوكاتتىق قىزمەتپەن اينالىسۋ وتە قيىن. ويتكەنى كەز كەلگەن ىستە ادۆوكات كليەنتىن قورعاۋ بارىسىندا بەلسەندلىك كورسەتە باستايتىن بولسا، وندا ادۆوكاتتىڭ ءوزىنىڭ ۇستىنەن قىلمىستىق ءىس قوزعالۋ، ليتسەنزياسىنان ايىرۋ سىندى ءتۇرلى قورقىتۋلار جاسالادى.

بۇدان بولەك قازاقستاندىق ءۇش ادۆوكات ەقىۇ (وبسە) جيىنىندا 14 قازان كۇنى استانا قالاسىندا رەسپۋبليكالىق ادۆوكاتتار سەزدىن وتكىزەتىندەرىن جانە سول جيىندا ەلدەگى تاۋەلسىز ادۆوكاتتاردىڭ قورعاۋعا بايلانىستى ماسەلەلەر كوتەرىلەتىنىن ايتقان.

“The Qazaq Times”