"استانا" حالىقارىلىق قارجى ورتالىعىنىڭ توراعاسى، بجزق ديرەكتورلار كەڭەسىنىڭ مۇشەسى قايرات كەلىمبەتوۆ ازەربايجاننىڭ حالىقارالىق بانكىندەگى زەينەتاقى قارجىسىنا قاتىستى جاعدايدىڭ قالاي بولىپ جاتقانى تۋرالى ايتتى.

ول ۇكىمەت ۇيىندە بولعان ءباسپاسوز كونفەرەنتسياسىندا اتالعان بانكتىڭ بجزق الدىنداعى قارىزىن قايتا قۇرىلىمداۋ بويىنشا كەلىسسوزدەر اياقتالعانىن مالىمدەدى.

"بۇل كەلىسسوزدەر قايتا قۇرىلىمداۋ كەلىسىمىمەن اياقتالدى. 250 ملن دوللار كولەمىندەگى قارىز كولەمى ساقتالدى. پايىزدىق مولشەرلەمە تومەندەتىلدى، ەسەسىنە حالىقارالىق بانكتىڭ قاعازدارى ەلدىڭ قارجى مينيسترلىگىنىڭ ەۋرووبليگاتسيالارىنا اۋىستىرىلدى. ياعني ازەربايجان تاراپىنان باعالى قاعازدار ءجۇز پايىزعا كەپىلدەنگەن. قۇجاتتار 15 جىلعا بەرىلدى جانە ينۆەستيتسيانىڭ تابىستى بولۋىنا كەپىلدىك بەرەدى. بارلىق پروتسەسس 1 قىركۇيەك كۇنى اياقتالدى", - دەدى كەلىمبەتوۆ.

سونداي-اق، ول بانكتەگى زەينەتاقى قاراجاتى تولىق قايتارىلاتىنىن ەسكە سالدى.

"قارجى تولىق كولەمدە قايتارىلادى. بۇدان بۇرىن بۇل قاعازداردىڭ مەرزىمى 10 جىل بولسا، ەندى 15 جىلعا ۇزارتىلدى. الايدا بۇل قاعازدار ۇنەمى كىرىس الىپ كەلەدى. بۇدان بولەك 40 ملن دوللار وبليگاتسيالاردى ساتىپ الۋ تۇرىندە تولەندى. سوندىقتان جاعداي قالىپتى جانە ۋايىمداۋعا ەش نەگىز بولماۋ كەرەك", - دەدى ول.

ايتا كەتەيىك، مامىر ايىندا  قازاقستاندىق ەكونوميستەر تاراپىنان ازەربايجان حالىقارالىق بانكىنە زەينەتاقى قورىنىڭ 71,3 ملرد تەڭگەسى ينۆەستيتسيالانعانى تۋرالى اقپارات تاراعان ەدى. وسىدان كەيىن 23 مامىر كۇنى ازەربايجان بانكى كرەديتورلار الدىنداعى بورىشتى قۇرىلىمداۋدىڭ ءۇش نۇسقاسىن ۇسىنعان. ولار ۇسىنعان ءۇش نۇسقا تومەندەگىدەي:

  • ءبىرىنشىسى - ءاحب-ءتىڭ 250 ملن دوللار قارىزىن ءازىربايجان رەسپۋبليكاسىنىڭ مەملەكەتتىك قۇندى قاعازدارى تۇرىندە 200 ملن اقش دوللار ەتىپ، 12 جىلدا 5,125 پايىز مولشەرلەمەمەن قايتارۋ.
  • ەكىنشىسى - 250 ملن دوللار قارىزدى ءازىربايجان رەسپۋبليكاسىنىڭ مەملەكەتتىك قۇندى قاعازدارى رەتىندە 15 جىلدا 3,5 پايىزدىق مولشەرلەمەمەن قايتارۋ.
  • ءۇشىنشىسى - 250 ملن اقش دوللارىن ءازىربايجان رەسپۋبليكاسىنىڭ مەملەكەتتىك قۇندى قاعازدارى رەتىندە 7 جىلدا 3,5 پايىزدىق ۇستەمەمەن 250 ملن اقش دوللار ەتىپ قايتارۋ.

“The Qazaq Times”