يراك پارلامەنتى كۇردىستان اۆتونومياسىنىڭ جەكە مەملەكەت رەتىندە تاۋەلسىزدىك الۋ تۋرالى باستاما كوتەرىپ، وسى ايدىڭ سوڭىنا قاراي رەفەرەندۋم وتكىزبەك بولعان ويىن قولداعان جوق. دەپۋتاتتار يراكتىڭ تۇتاستىعىن ساقتاپ قالۋعا داۋىس بەردى. 

يراكتىڭ ۇكىمەت باسشىسىنا تەرريتوريالىق تۇتاستىقتى ساقتاۋ ءۇشىن كەلىسىمدەرگە كەلۋ تاپسىرىلىپ، رەفەرەندۋمدى بولدىرماۋ مىندەتى جۇكتەلىپ وتىر. وسىعان دەيىن اقش پەن ۇلىبريتانيا كۇردىستان اۆتونومياسىنىڭ باسشىسىن "يسلام مەملەكەتى" لاڭكەستىك ۇيىمىنا قارسى كۇرەس جۇرگىزىپ وتىرعان يراكقا قوسىمشا ماسەلە تۋردىرماۋعا شاقىرعان بولاتىن. كۇرد حالقىنىڭ تاۋەلسىزدىگىن قولدامايتىنداردىڭ قاتارىندا يران مەن تۇركيا دا بار.

يراكتاعى 37 ميلليون حالىقتىڭ 15-20 پايىزىن قۇرايتىن كۇردتەر مەملەكەت ىشىندەگى ەڭ ءىرى ءتورت ەتنيكالىق توپتىڭ ءبىرى. 1991 جىلى اۆتونوميا بولعان كۇردتەر يراكتىقتاردان ىرگەسىن ءبىرجولا اۋلاق سالۋعا العاشقى قادامىن 25 قىركۇيەكتە ءۇش اۋداندا بەلگىلەنگەن رەفەرەندۋمنان باستاماق.

“The Qazaq Times”