قىتاي ۇكىمەتى تايۆانداعى دەموكراتيالىق پرينتسيپتەردى جاقتاۋشى قوعام بەلسەندىسى لي مين چەندى الەۋمەتتىك جەلى توپتارىندا "كوپپارتيالىق جۇيەنى" ناسيحاتتاپ، مەملەكەتتىك بيلىككە قاۋىپ توندىرگەنى ءۇشىن ايىپتاپ، سوت الدىندا جاۋاپقا تارتتى. بۇل تۋرالى ۆۆس اقپاراتتىق اگەنتتىگى جازدى. 

تايۆانداعى ادام قۇقىقتارى جونىندەگى قوعام بەلسەندىسى وسى جىلدىڭ ناۋرىز ايىندا قىتايعا ساپار شەگىپ، قايتىپ ورالماعان. ونى الاسۇرا ىزدەگەن جاقىندارى ونىڭ حابارىن  29 ناۋرىزدا قىتاي ۇكىمەتى رەسمي تۇردە لي مين چەنىڭ ايىپتالىپ، قاماۋدا وتىرعانىن مالىمدەگەننەن كەيىن ءبىلدى.

سوتتا لي مين چەنى ايىپتاعان پروكۋروردىڭ ايتۋى بويىنشا، قوعام  بەلسەندىسى QQ حابارلاما الماسۋ قوسىمشاسىندا 2 مىڭعا جۋىق وقىرمانى بار توپتا قىتايدا كوپپارتيالىق جۇيە ورناتۋ تۋرالى پىكىرلەر جازىپ، مەملەكەتكە قارسى ويلاردى ناسيحاتتاعان.

لي مين چەنىڭ جاقىندارى ونىڭ قىتايدا دوستارى كوپ بولعانىن جانە ولاردىڭ اراسىندا قىتاي-تايۆان قارىم-قاتىناستارى مەن قازىرگى ماسەلەلەرى جونىندە وي الماسقاندارىن، بىراق قىتاي مەملەكەتتىلىگىنە نۇقسان كەلتىرەتىن ەشقانداي ارەكەتكە بارماعانىن ايتادى.

ايتا كەتەيىك، قىتاي تەك "كوپپارتيالى جۇيەنى" ناسيحاتتاعان ءوز ازاماتتارىن عانا جازاعا تارتىپ وتىرعان جوق. بۇعان دەيىن قىتايداعى ەتنيكالىق قازاقتاردى دا قۋدالاپ، "يسلام ءدىنىن ناسيحاتتادى" دەگەن جەلەۋمەن حالىققا قىسىم كورسەتكەن ەدى.

“The Qazaq Times”