يسپانيانىڭ پرەمەر-ءمينيسترى ماريانا راحوي وسى جىلدىڭ 1 قازانىنا بەلگىلەنگەن كاتالونيانىڭ تاۋەلسىزدىگىنە ارنالعان رەفەرەندۋمدى توقتاتۋعا ۋادە بەردى. ول كاتالوندىقتاردىڭ جەكە مەملەكەت بولۋ تۋرالى تىلەگىن "ورتالىق بيلىككە باعىنباۋشىلىق" دەپ تاپتى. 

كاتالونيا باسشىلارى: "ورتالىق بيلىكتىڭ وتىنىشىمەن جوعارعى سوت رەفەرەندۋم وتكىزۋگە تىيىم سالىپ، ونى توقتاتۋعا ارەكەت ەتسە دە، تاۋەلسىزدىك جولىنداعى قوزعالىسىمىزدى جالعاستىرا بەرەمىز", - دەپ وتىر.

ماريانا راحوي يسپانيانىڭ وڭتۇستىك-شىعىسىندا ورنالاسقان باي وڭىردەگى پلەبيستسيت (رەفەرەندۋم) جۇزەگە اسپاس ءۇشىن، قولىنان كەلگەننىڭ ءبارىن جاسايتىنىن جەتكىزدى. سونداي-اق، پرەمەر-مينيستر كاتالونيانىڭ 947 مەرىنە رەفەرەندۋمدى وتكىزۋگە توسقاۋىل بولۋ تۋرالى تاپسىرمالار بەرىلگەنىن حابارلادى. يسپانيانىڭ باس پروكۋرورى حوسە مانۋەل مازانىڭ ايتۋىنشا، اتالعان تاپسىرمانى ورىنداۋدان باس تارتقاندار جازالانۋى مۇمكىن.

يسپانيانىڭ جوعارعى سوتى رەفەرەندۋم وتكىزۋدىڭ ەل كونستيتۋتسيسىنا قايشى كەلەتىنىن العا تارتىپ، وعان تىيىم سالاتىن شەشىم شىعارعان.

يسپانيا بيلىگىنىڭ الاڭداۋشىلىعى كاتالونيا پرەزيدەنتى كارلس پۋدجەمونتتىڭ قازىردىڭ وزىندە 560 مۋنيتسيپاليتەت رەفەرەندۋمدى قولدايتىنىن ايتىپ، 16 مىڭ ەرىكتى سايلاۋعا كومەكتەسۋگە تىركەلگەنى تۋرالى حابارلاماسىنان كەيىن ارتا ءتۇستى.

كەشە كاتالونيانىڭ جەرگىلىكتى پارلامەنتى يسپانيا كورولدىگىنەن ءبولىنىپ، جەكە رەسپۋبليكا اتانۋعا ارنالعان  جوباسىن دايىندادى. ەگەر حالىقتىق رەفەرەندۋم جەڭىسكە جەتسە، زاڭ جوباسى كۇشىنە ەنىپ، جاڭا مەملەكەت قۇرىلادى.

ۇلىبريتانيانىڭ استون ۋنيۆەرسيتەتىندەگى يسپانياداعى تاۋەلسىزدىك جولىنداعى قوزعالىستار ماسەلەسى بويىنشا ساراپشى كەرولاين گرەي كاتالونيانىڭ تاۋەلسىزدىگىن الەمدىك قاۋىمداستىقتىڭ مويىنداۋى قيىن بولاتىنىن ايتىپ، الداعى رەفەرەندۋمعا قاتىستى الاڭداۋشىلىق ءبىلدىردى.

“The Qazaq Times”