قازاقستاندا مۇناي ونىمدەرىن ءوندىرۋ، ونى ساقتاۋ جانە وتكىزۋ نىساندارىندا ەسەپتەۋدى باقىلايتىن قۇرالدى ورناتۋ مۇناي سالاسىن قۇلدىراتىپ جىبەرۋى مۇمكىن.   استانا قالاسىندا "اتامەكەن" ۇلتتىق كاسىپكەرلەر پالاتاسىنىڭ وكىلدەرى وسى جۇيەنى جۇزەگە اسىرۋداعى تۇيتكىلدى ماسەلەلەردى تالقىلاۋ ماقساتىندا جيىن وتكىزدى.

جيىنعا قاتىسقان «In Oil LTD KZ» جشس باس ديرەكتورىنىڭ ورىنباسارى يۋليا جەرناكوۆا ەسەپتەۋدى باقىلايتىن قۇرالدى تاجىريبە جۇزىندە كورسەتە وتىرىپ، ونى ەنگىزۋدىڭ تەحنيكالىق جانە قارجىلىق تۇرعىدان پايداسى تومەن ەكەنىن ءتۇسىندىردى. ونىڭ ايتۋىنشا، بۇرىنعى ءتاسىل وڭتايلى ءارى شاعىن اۆتوجانارماي قۇيۋ ستانتسيالارى ءۇشىن قارجىلىق جاعىنان قولايلى ەكەن.

«اتامەكەن»  ۇكپ تورالقا مۇشەسى، مۇناي-گاز ونەركاسىبى كوميتەتىنىڭ توراعاسى دانيار ابىلعازين مەن «In Oil LTD KZ» جشس باس ديرەكتورىنىڭ ورىنباسارى يۋليا جەرناكوۆا

«ەڭ باستىسىن اتاپ كورسەتكەن ءجون، بۇل جاڭالىقتى ەنگىزە وتىرىپ جانارمايدىڭ ءار ليترىنە قوسىمشا قارجىلىق ۇستەمە سالىنادى، ياعني بەنزين باعاسى قىمباتتايدى»، - دەپ اتاپ ءوتتى يۋليا جەرناكوۆا.

ال «اتامەكەن»  ۇكپ تورالقا مۇشەسى، مۇناي-گاز ونەركاسىبى كوميتەتىنىڭ توراعاسى دانيار ابىلعازين استاناداعى جانارماي قۇيۋ ستانتسيالارى مەن مۇناي بازالارىندا وسىنداي ماسەلە بولسا، وندا وڭىرلەردەگى جەتكىزۋشىلەرگە بۇل جۇيەنى قابىلداۋ ءتىپتى قيىنداي تۇسەتىنىن اتاپ ءوتتى.

بيزنەس وكىلدەرى بۇل ماسەلەنىڭ قارجىلىق جاعىنا دا الاڭداۋلى. سەبەبى ەسەپتەۋدى باقىلايتىن قۇرالداردى ورناتۋ قىمبات، شىعىنعا ۇشىراتىپ، ءتىپتى مۇناي بازالارى مەن شاعىن جانارماي قۇيۋ ستانتسيالارىنىڭ جابىلۋىنا اكەپ سوعۋى مۇمكىن.

«شاعىن جانە ورتا بيزنەسكە وسى قۇرالداردى ورناتۋدان باسقا دا ماسەلە كوپ. مىنا جۇيەنى ورناتۋ شاعىن جانارماي قۇيۋ ستانتسيالارىن جابۋعا يتەرمەلەۋى مۇمكىن، ولار مىناداي سومانى كوتەرە المايدى»، - دەدى «اتامەكەن» قر ۇكپ باسقارما توراعاسىنىڭ ورىنباسارى ەلدوس رامازانوۆ.

«قازاقستان وتىن قاۋىمداستىعى» زتب اقپاراتىنا سۇيەنسەك، ءبىر مۇناي بازاسىنا اتالعان جۇيەنى ورناتۋعا (مىسالى، 26 تىك جانە 10 كولدەنەڭ رەزەرۆۋار) كەمىندە 120 ملن تەڭگە كەرەك، ال ءبىر اۆتوجانارماي قۇيۋ ستانتسياسى ءۇشىن ورتاشا العاندا 5 ملن تەڭگە جۇمسالادى ەكەن. ال بۇل قاراجاتقا نىساندى قايتا جوبالاۋ مەن قۇرىلىس جۇمىستارىنا كەتەتىن ۋاقىت پەن جۇمىس كۇشىنىڭ شىعىنى ەنگىزىلمەگەن. سونىمەن قاتار جۇيەنى ەنگىزگەننەن كەيىن بيزنەس سۋبەكتىلەرى ەسەپتەۋدى باقىلايتىن قۇرالدى ورناتۋ بويىنشا شىعىندى وتەۋدەن بولەك، مالىمەتتەر وتكىزۋ جۇيەسىنە قىزمەت كورسەتۋ بويىنشا وپەراتسيالىق شىعىندارعا قاراجات ءبولۋ كەرەك بولادى، ونىڭ ءوزى ءبىرشاما سومانى قۇراۋى ىقتيمال.

وسىلايشا جيىنعا قاتىسقاندار بۇل ماسەلەدە ادال بيزنەستى قولدايتىنىن جانە بۇگىندە ادال كاسىپكەرلەر جانار-جاعارماي ماتەريالدارىنىڭ جەتكىزىلۋى تۋرالى تولىق اقپاراتتى بەرىپ وتىرعانىن ايتتى.

"مەملەكەتتىك ورگاندار جاسىرىنىپ جۇمىس ىستەپ وتىرعاندارمەن كۇرەسۋ ءۇشىن بيزنەس-قوعامداستىققا ەسەپتەۋدى باقىلايتىن قۇرالدى ورناتۋ سەكىلدى جاپپاي سالماق تۇسىرەتىن ەمەس، باسقا مەحانيزمدەردى ويلاستىرۋى قاجەت»، - دەدى ەلدوس رامازانوۆ.

سونداي-اق، جيىنعا قاتىسۋشىلار 2018 جىلدىڭ قاڭتارىنان باستاپ جوعارىدا اتالعان ماسەلەلەرمەن قاتار، مۇناي ونىمدەرىن جەتكىزۋدە دە قيىندىق تۋى مۇمكىن ەكەنىن العا تارتتى. سوندىقتان وسى ماسەلەنى تۇبەگەيلى شەشكەن ءجون، نە بولماسا وسى ەسەپتەۋدى باقىلايتىن قۇرالداردى ورناتۋدان مۇلدەم باس تارتقان ابزال ەكەنىن اتاپ ءوتتى.

“The Qazaq Times”