وڭتۇستىك قازاقستان وبلىسىندا كەلەسى جىلى 30 شاعىن سۋ قويماسىنىڭ قۇرىلىسى باستالادى. بۇل تۋرالى اكىمدىكتىڭ ءباسپاسوز قىزمەتى حابارلادى.

وبلىستىق اۋىل شارۋاشىلىعى باسقارما باسشىسىنىڭ مىندەتىن ۋاقىتشا اتقارۋشى تۇرعانبەك وسپانوۆتىڭ ايتۋىنشا، وڭىردەگى سۋ تاسقىنىنا قارسى ينجەنەرلىك 98 ءىس-شارا اتقارىلىپ، سۋ جيناقتاۋ كولەمى 342,75 ملن شارشى مەتردى قۇرايتىن 30 شاعىن سۋ قويماسى ايقىندالعان. ناتيجەسىندە 12 نىسان بويىنشا جوبالاۋ سمەتالىق قۇجاتتاما ازىرلەنگەن. بيىل جەرگىلىكتى بيۋدجەتتەن 2 نىسانعا 174, 2 ملن تەڭگە بولىنسە، قالعان 10 نىسانعا 960,98 ملن تەڭگە قاراستىرىلعان.

الايدا رەسپۋبليكالىق جول كارتاسىن بەكىتۋ كەزىندە وڭتۇستىك قازاقستان وبلىسى بويىنشا 29 نىسان ەنگىزىلمەي قالعان. وسى قالعان 29 نىسان بويىنشا وبلىستىق دەڭگەيدە ارنايى ءىس-شارالار كەشەنى ازىرلەنىپ، وبلىستىق بيۋدجەتتەن 2,1 ملرد تەڭگە بولىنگەن.  جالپى قۇنى شامامەن 6,3 ملرد تەڭگە بولاتىن 30 شاعىن سۋ قويماسىنىڭ قۇرىلىسى ەندى ەكى كەزەڭ بويىنشا جۇزەگە اساتىن بولادى. ءبىرىنشى كەزەڭدە جالپى قۇنى 3,8 ملرد تەڭگە بولاتىن 5 جوبانى ىسكە اسىرۋ جوسپارلانعان.

ايتا كەتەيىك، قازاقستاننىڭ كوپشىلىك ايماقتارىندا سۋ قويمالارىنىڭ ساپاسى سىن كوتەمەيدى. ونى كوكتەم شىعا سالا لاي باتپاققا باتىپ، سۋ تاسقىنىنان زارداپ شەگىپ وتىرعان ءتۇرلى وڭىرلەردەن-اق بايقاۋعا بولادى.

“The Qazaq Times”