پرەزيدەنت: مىندەتتى الەۋمەتتىك مەديتسينالىق ساقتاندىرۋدى ەنگىزۋگە اسىقپاۋ كەرەك

قازاقستان پرەزيدەنتى نۇرسۇلتان نازارباەۆ مىندەتتى الەۋمەتتىك مەديتسينالىق ساقتاندىرۋ جۇيەسىندەگى كەمشىلىكتەرگە نازار اۋدارىپ، اتالعان جۇيەنى ەنگىزۋگە اسىقپاۋعا شاقىردى. 

ء"وزىن جۇمىسپەن قامتىعان 3 ميلليون ادام مەديتسينالىق ساقتاندىرۋسىز قالايىن دەپ تۇر. سوسىن ولار بىزگە نە ايتادى؟ وداندا وسىنداي نەگىزگى ماسەلەلەردى شەشەيىك. مەن تاعى ايتامىن، بۇعان ءبىز پروگرەسسيۆتى تۇردە وتەتىن شىعارمىز، مەن بۇعان قارسى ەمەسپىن. الايدا تاعى ءسۇرىنىپ كەتپەيىك. سولاي ەمەس پە...(...). ەگەر بىزدە وسىنداي سۇراقتار تۋىنداپ تۇرسا، سىزدەر نەگە "مەديتسينالىق ساقتاندىرۋعا"وتەمىز  دەپ ايتاسىزدار؟", - دەدى پرەزيدەنت پارلامەنتتىڭ قوس پالاتاسىنىڭ بىرىككەن وتىرىسىندا پرەمەر باقىتجان ساعىنتاەۆ پەن دەنساۋلىق ساقتاۋ ءمينيسترى ەلجان بىرتانوۆقا قاراتا سويلەگەن سوزىندە.

"حالىقتىڭ ءبىر بولىگى مەديتسينالىق قىزمەتتى تەگىن الىپ جاتقاندا، مەن نەگە تولەۋىم كەرەك؟" دەپ ايتادى عوي. مۇنى رەتتەۋ كەرەك. قاشان رەتتەلەدى، ءبىز سول كەزدە پارلامەنتپەن جانە سىزدەرمەن بىرگە بۇل ماسەلەگە قاتىستى شەشىمدى قابىلدايمىز. مەن دۇرىس ايتىپ وتىرمىن با؟", - دەپ سۇراق قويدى پرەزيدەنت ۇكىمەت وكىلدەرىنە.

ايتا كەتەيىك، مىندەتتى الەۋمەتتىك مەديتسينالىق ساقتاندىرۋ جۇيەسى 2017 جىلدىڭ 1 شىلدەسىنەن باستاپ كۇشىنە ەندى. مەدساقتاندىرۋ قورىنا ازىرگە جۇمىس بەرۋشىلەر مەن كاسىپكەرلەر جارنا اۋدارىپ جاتىر. 30 تامىز كۇنى مەديتسينالىق ساقتاندىرۋ قورى اۋدارىلعان قاراجاتتىڭ 5,44 ملرد تەڭگەدەن اسقانىن حابارلاعان ەدى.

ەسكەرەتىن جايت، ءمامس جۇيەسى ەنگىزىلمەي تۇرىپ كەيبىر ەكونوميستەر بۇل جۇيەنى ەنگىزۋ قازاقستان ءۇشىن ءتيىمسىز ەكەنىن ايتقان.

سونداي-اق، پرەزيدەنتتىڭ قولداۋىنا يە بولا الماعان زاڭ جوباسى تەك بۇل عانا ەمەس. 2016 جىلى دا جەر كودەكسىنە قاتىستى شيكىلىكتەر شىعىپ، نۇرسۇلتان نازارباەۆ كودەكستەگى بىرقاتار نورماعا موراتوري جاريالاعان ەدى.