فوتو: Technosider

Reuters اگەنتتىگىنىڭ 5 تامىزداعى حابارىندا، اقش قۇرلىق ارمياسىنىڭ ءبىرتۇتاس بۇيرىق شىعارىپ، قىتايلىق يننوۆاتسيالىق ءوندىرىس ورىنىنىڭ وندىرگەن كەز-كەلگەن تۇردەگى ۇشقىشسىز ۇشۋ اپاراتتارىن (درونداردى) قولدانۋعا شەكتەۋ قويدى. ايىپتاۋدا ايتىلۋىنشا، «بۇل ونىمدەردە جەلىلىك قاۋىپسىزدىكتى ساقتاۋ جاعىندا كوپتەگەن كەمشىلىكتەرى بار» دەلىنگەن. بۇل تۋرالى قىتايلىق «شينلاڭ» اقپاراتتىق اگەنتتىگىنىڭ سايتىندا جازىلدى.

اقش قۇرلىق ارمياسى بۇل شەشىمدى 2 تامىزدا عالامتوردا جاريا ەتكەن. اقش قۇرلىقتىق ديۆيزياسى كەلەسى قادامدا قىتايلىق «Dajiang» يننوۆاتسيالىق ءوندىرىس كاسىپورنى وندىرگەن بارلىق ونىمدەردىڭ باتارەيالارىن، ساقتاۋ قۇرىلعىلارى جانە قاۋىپسىزدىك جابدىقتار جيناپ الماق بولىپ وتىر. وسىعان دەيىن اقش قۇرلىقتىق ديۆيزياسى «Dajiang» كاسىپورنى وندىرگەن ۇشقىشسىز ۇشۋ قۇرلىعىلارىن كوپتەپ پايدالانىپ كەلگەن.

اقش-تىڭ قىتايلىق بۇل ءونىمدى تۇبەگەيلى شەكتەۋى قىتاي كاسىپورىندارىن ۇمىتسىزدەندىرگەن. «Dajiang» كومپانياسى جاريالاعان حابارلامادا: «بۇل بىزگە ۇمىتسىزدىكتى الىپ كەپ وتىر. الداعى ۋاقىتتا، اقش قۇرلىق ديۆيزياسىمەن بايلانىس ورناتىپ، جەلىلىك قاۋىپسىزدىكتەگى كەمشىلىگى بار دەگەن ايىپتارىنىڭ ماعىناسىن ناقتىلاعالى وتىرمىز. ءتىپتى، پەنتاگونمەن بايلانىس ورناتۋعا دا دايىنبىز. بارىنشا الاڭداۋشىلىقتى جويۋعا تىرىسامىز»، – دەلىنگەن.

2016 جىلدىڭ ساراپتاۋ قورىتىندىسى بويىنشا، «Dajiang» كومپانياسى الەمدەگى ۇشقىشسىز ۇشۋ اپاراتتارىن ءوندىرۋ نارىعىنىڭ 70 پايىزىن يەلەنەدى. الداعى بەس جىلدا ارميالاردى قامتىعان تۇتىنۋشىلارعا قۇنى 100 ملرد دوللاردان اساتىن ءونىم ءوندىرۋدى جوسپارلاپ وتىرعان.

اقش قۇرلىقتىق ديۆيزياسىنىڭ قىتايلىق درونداردى شەكتەۋىنىڭ باستى سەبەبى - قۇرلىق قوسىندارىنىڭ كوپتەگەن تاجىريبە سىناقتارىنىڭ ەستەلىگى قىتايلىق كاسىپورىندار وندىرگەن درونداردا ساقتالعان. الىستان مەڭگەرۋگە ارنالعان بۇل قۇرىلعىلاردان قىتاي نەمەسە وزگە ەلدەردىڭ جەلىلىك شابۋىلدار ارقىلى وسى ماڭىزدى قۇپيالىقتاردى ۇرلاپ كەتۋىنەن الاڭداپ وتىر.

“The Qazaq Times”