جالاقى، زەينەتاقى مەن جاردەماقى ءوستى

بۇگىننەن باستاپ  اسكەري قىزمەتكەرلەر مەن پوليتسيانىڭ جالاقىسى ءوسىپ، جاردەماقى مەن زەينەتاقى كوتەرىلەدى جانە مىندەتتى مەديتسينالىق ساقتاندىرۋعا اقشا اۋدارۋ باستالادى.

قر قورعانىس مينيسترلىگى، مەملەكەتتىك كۇزەت قىزمەتى، ۇلتتىق قاۋىپسىزدىك كوميتەتى، ۇلتتىق گۆارديا قىزمەتكەرلەرىنىڭ  جالاقىسى 25 پايىزعا ءوستى. پرەزيدەنت ن.ءا.نازارباەۆ بۇل تۋرالى مامىر ايىندا جاساعان مالىمدەمەسىندە بۇل شارا ەل تاۋەلسىزدىگى مەن قارۋلى كۇشتەردىڭ 25 جىلدىعىنا وراي قولعا الىنىپ وتىرعانىن ايتقان ەدى.

ءدال وسىنداي جالاقىسىنا 25 پايىزدىق ۇستەمەگە پوليتسيا قىزمەتكەرلەرى دە قول جەتكىزەدى. سونداي-اق، قازاقستاندىقتاردىڭ زەينەتاقىسى 20 پايىزعا ارتىپ، ەندى ەڭ تومەنگى زەينەتاقى مولشەرى 45177 تەڭگەنى قۇرايدى. اعىمداعى جىلدىڭ ماۋسىم ايىنداعى پرەزيدەنتتىڭ جارلىعىنا سايكەس جوعارىلاعان زەينەتاقىنى ەلدەگى 2 ملن زەينەتكەردىڭ بارلىعى الاتىن بولادى.

2017 جىلدىڭ 1 شىلدەسىندە بالانىڭ دۇنيەگە كەلۋىنە بايلانىستى بەرىلەتىن ءبىر رەتتىك جاردەماقىنىڭ كولەمى بۇرىنعىدان  20 پايىزعا كوبەيەدى.

سونىمەن قاتار، بۇگىننەن باستاپ جۇمىس بەرۋشىلەر مەن جەكە كاسىپكەرلەر ۇزاق تالقىعا تۇسكەن مىندەتتى مەديتسينالىق ساقتاندىرۋدىڭ قارجىسىن الەۋمەتتىك-مەديتسينالىق ساقتاندىرۋ قورىنا اۋدارا باستايدى.

“The Qazaq Times”