ەۆەرەستتى باعىندىرماق بولعان ون الپينيست قازا بولدى

ىزدەۋ توبى ەۆەرەست تاۋىندا شاتىر ىشىنەن ءتورت ءالپينيستىڭ دەنەسىن تاپقان. ەۆەرەستتە ماۋسىم باسىنان بەرى قازا تاپقان الپينيستەردىڭ جالپى سانى ونعا جەتتى. بۇل تۋرالى بي-بي-سي ارناسى حابارلادى.

قۇتقارۋشىلار جەكسەنبى كۇنى قازا بولعان سلوۆاكيالىق ءالپينيستىڭ دەنەسىن ىزدەۋ بارىسىندا شاتىردى تاپقان.

قازا بولعانداردىڭ بارلىعىنىڭ دەنەسىن اۋا دەڭگەيى وتە تومەن، «ءولى ايماق» دەپ اتالاتىن جەردەن تاپقان.

جەرگىلىكتى باق-تىڭ ايتۋىنشا، شاتىرداعى ەكى الپينيست شەتەلدىك، ال قالعان ەكەۋى جولسەرىك-شەرپ ەكەندىگى انىقتالدى.

بۇل ماۋسىمدا ەۆەرەستتە اۆستراليالىق فرانچەسكو ماركەتتي، ينديالىق راۆي كۋمار، سونىمەن قاتار تاۋ شىڭىن باعىندىرعان ەڭ قارت ادام اتاعىنا ۇمىتكەر بولعان 85 جاستاعى  مين باحادۋر شەرچان قازا تاپقان.

ءساۋىردىڭ سوڭىندا ەۆەرەستتە ادام نانعىسىز جىلدامدىعىنا بايلانىستى  «شۆەيتسارلىق ماشينا» اتاعىنا يە بولعان شۆەيتسارلىق بەلگىلى الپينيست ۋلي شتەك تە قازا بولدى.

سونىمەن بىرگە، رەيتەر اگەنتتىگىنىڭ مالىمەتى بويىنشا، ماۋسىم باسىنان ەۆەرەست شىڭىن وڭ جاعىنان 382 الپينيست جانە تيبەت جاعىنان 120 الپينيست ءساتتى باعىندىرعان.

قازا تاپقاندار سانى بويىنشا 2015 جىلعى ماۋسىم رەكوردتى جىل بولدى، قار كوشكىنى مەن تاسقىنعا بايلانىستى 24 ادام قازا بولعان.

جالپى 4 مىڭنان استام ادام ەۆەرەست شىڭىن باعىندىرماقشى بولسا، سونىڭ 200-دەن استامى قازا تاپقان.

فاريزا مۇقانوۆا

“The Qazaq Times”