الەمدىك تۇركولوگيادا ايرىقشا ورنى بار عالىم، فيلولوگيا عىلىمدارىنىڭ دوكتورى، پروفەسسور، بىتىك تاستىڭ بىلگىرى اتانعان قارجاۋباي سارتقوجاۇلىنىڭ ءتورت كىتابىنىڭ تۇساۋى كەسىلدى.

18-مامىر - تۇركى جازۋى كۇنىنە وراي جانە عالىمنىڭ 70 جىلدىق مەرەيتويى قارساڭىندا استانادا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە «بايىرعى تۇركى قۇندىلىقتارى - 2017» اتتى حالىقارالىق كونفەرەنتسيا ۇيىمداستىرىلدى. وعان وتاندىق تۇركولوگتارمەن قاتار تۇركيا، وڭتۇستىك كورەيا، موڭعوليانىڭ بەلگىلى عالىمدارى قاتىسىپ، تۇرىكتانۋدىڭ وزەكتى ماسەلەلەرى مەن بولاشاق دامۋ باعىتتارىن تالقىلاپ جاتىر. سونداي-اق، حالىقارالىق كونفەرەنتسيادا ن.ءا.نازارباەۆتىڭ «بولاشاققا باعدار: رۋحاني جاڭعىرۋ» اتتى ماقالاسىندا كورىنىس تاپقان «تۋعان جەر»،«قازاقستاننىڭ كيەلى جەرلەرىنىڭ گەوگرافياسى» سىندى جوبالارىنا عىلىمي تۇرعىدان ۇلەس قوسۋ، تۇرىكتىلدەس مەملەكەتتەردىڭ مادەني وركەنيەتى ينتەگراتسياسىن جاساۋ كوزدەلگەن.

سونىمەن بىرگە، كونفەرەنتسيا اياسىندا ق.سارتقوجاۇلىنىڭ «ءۇيسىن حاندىعى»، «تاس كىتاپتىڭ قۇپياسى»، «تاستا قالعان تاعىلىم»، «زاپيسكي كازاحسكوگو تيۋركولوگا» اتتى جاڭا ءتورت كىتابىنىڭ تۇساۋى كەسىلدى. مۇندا عالىمنىڭ كونە تۇرىك قۇندىلىقتارىن زەرتتەگەن عىلىمي ماقالالارى قامتىلعان.

سالتاناتتى شاراعاقر مەملەكەتتىك سىيلىقتىڭ يەگەرى، قر پارلامەنتىنىڭ ەكس-دەپۋتاتى الدان سمايىل، ل.ن.گۋميلەۆ اتىنداعى ەۇۋ-ءنىڭ «وتىرار كىتاپحاناسى» عزو ديرەكتورى، ف.ع.دوكتورى تۇرسىن جۇرتباي، ۇر ۇعا اكادەميگى، عالىم، انتروپولوگ ورازاق سماعۇل، ىستانبۇل قالاسىنداعى «Yedi Tepe»ۋنيۆەرسيتەتى. ت.ع.د.، پروفەسسور احمەد تاشاعىل، (تۇركيا), وڭتۇستىككورەيالىق عالىم حەو حەۋن سيك سىندى عالىمنىڭ ۇزەڭگىلەس دوستارى، ارىپتەستەرى كەلىپ، جۇرەكجاردى لەبىزدەرىن ءبىلدىردى. عالىم تۋىپ-وسكەن باي-ولكە ايماعى اكىمىنىڭ ورىنباسارى ءشارىپ قابىل، باي-ولكە ءماسليحاتىنىڭ حاتشىسى ارىستان سەرىكبولات جانە تاريح عىلىمدارىنىڭ كانديداتى، اقىن راحمەت سۇراعان موڭعوليادان ارنايى كەلىپ، ق.سارتقوجاۇلىنىڭ قازاق ءتىلىنىڭ، مادەنيەتىنىڭ جانە ءداستۇرىنىڭ ساقتالۋىنا ۇلكەن ۇلەس قوسقانىن اتاپ ءوتتى جانە «بايان-ولگي ايماعىنىڭ قۇرمەتتى ازاماتى» اتاعىن تابىس ەتتى.

قارجاۋباي سارتقوجاۇلىنىڭ ەسىمى كوزى قاراقتى وقىرمانعا جاقسى تانىس. ول تۇرىك قاعاناتىنىڭ مەملەكەتتىك ءتىلىنىڭ دە، ورحون ماتىندەرىنىڭ ءتىلىنىڭ دە قىپشاق ءتىلى بولعانىن دالەلدەپ، «كوك تۇرىكتەر ەسكەرتكىشىنىڭ ءتىلى ۇيعىر ءتىلى» دەگەن تۇجىرىمدى تەرىسكە شىعارعان. موڭعوليادان كوشپەندىلەر مادەنيەتى، كونە تۇرىك تاريحى، جازۋ ەملەسىنە قاتىستى قۇندى جادىگەرلەردى استاناعا تاسىپ، الەمدە بالاماسى جوق «كونە جازۋ تاريحى مۋزەيىن» اشقان. بۇگىندە ول - كەمال اتاتۇرىك اتىنداعى تۇرىك تاريحى قۇرىمىنىڭ (اكادەمياسىنىڭ) تولىق مۇشەسى، فيلولوگيا عىلىمدارىنىڭ دوكتورى، تۇركىتانۋ جانە التايتانۋ عىلىمي-زەرتتەۋ ورتالىعىنىڭ ديرەكتورى، «كۇلتەگىن» سىيلىعىنىڭ لاۋرەاتى.

inform.kz