Qazaqstanda qazan-qaraşa aylarında virus jwqqanı anıqtalğan kemi 700 nauqastıñ statistkası bwrmalanğan. Prezident sınap söylese de, – Ükimet müşeleri aqtalıp älek. 

16 qaraşa küni prezident Toqaev «birqatar oblıstarda koronavirus indetine qatıstı jaña jağdaylardı jasıru derekteri anıqtalğanın» mälimdegen. Prezidenttiñ aytuınşa, statistikanı bwrmalau faktisiniñ ŞQO, SQO, Pavlodar,  Aqmola,  Qostanay oblıstarında tirkelgen, tipti «atalğan problemanıñ bizdiñ densaulıq saqtau jüyemizde de sozılmalı sipat alğanın moyındau kerek».

Beysenbi, 26 qaraşa küni öñir äkimderi Pavlodar oblısında 59, Qostanay oblısında 57 nauqastıñ mälimeti jalpı esepke keşigip engizilgenin mälimdegen. Bügin Aqmola oblısınıñ basşısı 100 jağday der kezinde öñdelmey, jalpı esepten tıs qalıp qoyğanın rastadı. Qaraşanıñ 27-si OKQ alañında densaulıq saqtau ministri Aleksey Coy men basşılıq ökilderi ötkizgen brifingte özge eki öñirdegi derekti topşıladı.

Redakciya tilşisiniñ swrağına jauap bergen Sanitarlıq-epidemiologiyalıq baqılau komitetiniñ törayımı Esmağambetova Ayjannıñ bergen mälimeti anıq emes. Sebebi Qostanay oblısınıñ baspasöz qızmeti 57 jağday jasırılğanın habarlağan.

«Aymaqtarda tekseru jürgizildi. Nätijesinde statistikağa kümän tudıratın jağdaylar anıqtaldı. Qostanayda 50 şaqtı, Pavlodarda 59, SQO-da 200, ŞQO-da 300 şaqtı, Aqmola oblısında 100 jağday turalı qate jiberilgen», – dep mälimdedi komitet jetekşisi Esmağambetova.

Elde koronavirus jwqqanı PTR testi arqılı naqtılanğan 700-den astam adamnıñ mälimeti jalpı esepke der kezinde kirmey qalğan. Resmi jauapqa qarağanda, qazirgi tañda statistika qalpına keltirilgen.

Bwğan sebep – auruhanalarda nauqastar artqan twsta virus anıqtalğandardıñ mälimetin wsınu procesi keşiktirilgen. Komitet bastığı Ayjan Esmağambetovanıñ redakciyağa bergen jauap hatında kadr tapşılığınan jükteme auırlap, derek uaqtılı öñdelip-joldanbağanı aytıladı.

– Ministrlikke keşigip tirkelgenin keyingi eki ayda bildik. Öytkeni ministr aytqanday bizde barlıq zerthanalarğa ortaq jüye joq. Laboratoriyalar tek ministrliktiñ mekemelerinde emes. Sonımen birge, basqa da auruhanalarda, özge ministrlikterde, jeke menşikte zerthanalar bar. Solardıñ bir aqparattıq jüyesi bolmağandıqtan, köptegen taldaulardıñ qorıtındısı keş kelip tüsti. Är jağday jeke tekserilip, tiisti aydıñ esebine qosıldı. Birde-bir analiz statistikadan tısqarı qalğan joq, – dep tüsindirdi vice-ministr Ajar Ğiniyatqızı öz nwsqasında.

Redakciya bes birdey oblıstağı jağdaydı naqtılauğa birneşe kün suırtpaqtap äreñ qol jetkizdi. Pandemiya bağdarına jauaptı moderator-vedomstvo DenMin men öñir äkimderi statistikadağı kemşilikti «jüyeniñ jetilmeui, tehnikalıq qatelik, jükteme auırtpalığı men maman tapşılığına» ısırsa, prezident jauaptı şeneunikterdiñ qatısuımen ötken jiında «ötirikti şınday etip jasırğanın» aşıq ayıptağan.

Ötken düysenbidegi Aqordanıñ basındağı kezekti keñeste Toqaev «Birqatar oblıstarda  koronavirus indetine qatıstı jaña jağdaylardı jasıru derekteri anıqtaldı. Äñgime Şığıs Qazaqstan,  Soltüstik Qazaqstan,  Pavlodar,  Aqmola,  Qostanay jäne basqa da oblıstar jayında bolıp otır. Ötirikti şınday söyletu asa qauipti qwbılıs ekenin tüsinu kerek. Öytkeni ol şınayı qauiptiñ betin bürkemeleydi. Sonday-aq  bükil elimiz boyınşa koronavirus indetine qarsı jürgizilip jatqan küres strategiyasına ziyanın tigizedi» degen edi.

Bügin är organ özinşe aqtalıp älek. Memleket basşısı «jasırdı» dese, jauaptılardıñ jauabı «solay bolıp qaldığa» sayadı. DenMin prezident aytqan «basqa da oblıstardıñ» deregin äli naqtılamadı. Tek bes öñirde mıñğa tarta jağday bwrmalansa, jalpı sanaq qanşağa jeteri belgisiz. Bwl jerde memlekettik statistikada jiberilgen olqılıqqa eşkim jauap bermeytin tärizdi. Osığan baylanıstı äzirge kimniñ qanday jauapqa tartılğanı turalı eşqanday resmi mälimet jariyalanğan joq.

Bwğan deyin Densaulıq saqtau ministriligi küzgi-qısqı tolqınğa «tas-tüyin», tipti 100% payız dayın ekenin bir emes, birneşe ret mälimdegen. Biraq bügingi tañda test qorıtındısı dauğa aynalıp, onı derekqorğa tirkeu mehanizminde aqau tuğanı belgili bolıp otır. Mwnı prezident «medicinalıq wyımdarğa jürgizilgen bağalau qorıtındısı olardıñ dayındıq deñgeyiniñ äli de tömen ekenin körsetti» dep bağaladı.

Resmi esepte pandemiya bastalğalı beri 171 mıñday adamnıñ auırğanı körsetilgenimen, kümänmen qaraytındar köp. «Sandj» zertteu ortalığı Qazaqstanda koronavirusqa şaldıqqandardıñ şınayı esebin anıqtau maqsatında 9 mıñnan astam respondentten saualnama jürgizgen. Statistika metodologiyasınıñ käsibi şarttarın qanağattandıratın zertteu qorıtındısına säykes, pandemiya bastalğalı naurız-qırküyek aylarınıñ aralığında halıqtıñ 20%-ı nemese 3,8 million adam virus jwqtırğanı belgili bolğan. Bwl resmi esepten 37 ese köp.

"The Qazaq Times"