Aqmola oblısında sanitarlıq-epidemiya qızmetinde maman jetispeuşiligi sebepti auırğandar resmi statistikağa enbey qalğan.

Aqmola oblısınıñ äkimi Ermek Marjıqpaev bügin Ortkomda ötken brifingte virus jwqqanı anıqtalğan 100 adamnıñ mälimeti jalpı esepke der kezinde kirmey qalğanın moyındadı.

 «Oblıstıq ştata nebäri 12 maman bolğandıqtan, 100 jağday öz uaqıtınan keşigip räsimdeldi», – dep aqtaldı Marjıqpaev.

Onıñ aytuınşa, auruşañdıq artıp, nauqastar köbeygen kezde jauaptı qızmetkerler barlıq aqparattı öñdep-qwjattandırıp ülgermeydi.

«Biz qazirgi tañda statistika dwrıs äri senimdi boluı üşin qoldan kelgenniñ bärin istep jatırmız. Uaqtılı engizilmegen mälimetter bügin jalpı esepke qosılğan. Statistika qalpına keltirildi», – dedi äkim.

Aymaq basşısınıñ sözine sensek, oblısta koronaviruspen küreske şamamen 16 mlrd teñge bağıttalğan. Aqmola oblısında 200 orındıq jaña jwqpalı aurular auruhanası salınıp, 4 mıñnan astam medicina qızmetkerine üstemaqı retinde 3 mlrd teñge tölengen.

16 qaraşa küni prezident Toqaev «Birqatar oblıstarda  koronavirus indetine qatıstı jaña jağdaylardı jasıru derekteri anıqtalğanın» mälimdegen. Prezidenttiñ aytuınşa, statistikanı bwrmalau faktisiniñ ŞQO, SQO, Pavlodar,  Aqmola,  Qostanay oblıstarında tirkelgen, tipti «atalğan problemanıñ bizdiñ densaulıq saqtau jüyemizde de sozılmalı sipat alğanın moyındau kerek».

Komitet törağası Ayjan Esmağambetovanıñ redakciyağa bergen pikirine qarağanda, kadr tapşılığınan jükteme auırlap, derek der kezinde öñdelip-joldanbağan. Auruhanalarda nauqastar artqan twsta virus anıqtalğandardıñ mälimetin wsınu procesi keşiktirilgen. Sol sebepti resmi statistikağa uaqtılı tirkelmegen jağdaylardıñ köbeygen körinedi.

Däl osığan wqsas jağday – Pavlodar oblısında 59, Qostanay oblısında 57 nauqastıñ mälimeti jalpı esepke keşigip engizilgen.

Bwğan deyin Densaulıq saqtau ministriligi küzgi-qısqı tolqınğa «tas-tüyin», tipti 100% payız dayın ekenin bir emes, birneşe ret mälimdegen. Biraq bügingi tañda test qorıtındısı dauğa aynalıp, onı derekqorğa tirkeu mehanizminde aqau tuğanı belgili bolıp otır. Resmi esepte pandemiya bastalğalı beri 171 mıñday adamnıñ auırğanı körsetilgenimen, kümänmen qaraytındar köp. «Sandj» zertteu ortalığı Qazaqstanda koronavirusqa şaldıqqandardıñ şınayı esebin anıqtau maqsatında 9 mıñnan astam respondentten saualnama jürgizgen. Statistika metodologiyasınıñ käsibi şarttarın qanağattandıratın zertteu qorıtındısına säykes, pandemiya bastalğalı naurız-qırküyek aylarınıñ aralığında halıqtıñ 20%-ı nemese 3,8 million adam virus jwqtırğanı belgili bolğan. Bwl resmi esepten 37 ese köp.

"The Qazaq Times"