Şveciya biligi koronaviruspen küreste «şved modeliniñ» tiimsizdigin moyındap, şekteu şaraların qatañdata bastadı. Bastapqıda Şveciya karantindi küşeytpey wjımdıq immunitet qalıptastırudı maqsat etkenmen, indet örşi tüsken.

Qazir mwnda kisi öliminiñ üş negizgi sebebiniñ qatarına  jürek jäne qan-tamırları auruları men qaterli isikten keyin koronavirus kirip otır. Qatañ şekteuler boyınşa endi qoğamdıq orındarda bwrınğıday 50 adam emes, 8 adamnan artıq jinaluğa bolmaydı. Bwl erejeniñ jerleu räsimine qatısı joq. Onda 20 adamğa deyin jinaluğa rwqsat beriledi. Tüngi 22:00-den keyin meyramhanalar men barlarda işimdik satuğa bolmaydı. Bwl şara keler jıldıñ naurızına deyin küşin joymaydı. El astanası Stokgol'm men üşinşi iri qala Mal'mede jıl soñına deyin mwrajaylar, sporttıq zaldar men basseynder jwmıs istemeydi.

Osığan baylanıstı mälimdeme jasağan el prem'er-ministri Stefan Leven: «Adamdardıñ ömiri men densaulığına töngen qauip kün sanap küşeyip, koronavirustı jwqtırğandar sanı artıp baradı. Jansaqtau bölimine tüskender de köp. Kisi öliminiñ körsetkişteri de köñil könşitpeydi. Siz indettiñ jeñil formasımen auırdıñız, biraq avtobusta, meyramhanada nemese dükende basqağa jwqtırdıñız delik. Al ol qart adam boluı mümkin. Qariyalardıñ qattı auıratının bilemiz. Sondıqtan saqtıqqa salğırt qaramay, jauapkerşilik tanıtayıq», – dedi.

Alğaş COVID-19 deregi tirkelgen memleketter jappay tötenşe jağday engizip, qauipsizdik şaraların küşeytti. Al Şveciya biligi koronavirustı jeñudiñ jalğız jolı – wjımdıq immmunitet qalıptastıru degen. YAğni indetti meylinşe köp halıq jwqtırıp, jazılıp şığuı kerek.

Osılayşa naurızda Europada virustı jeñu jolında eki bağıt qalıptastı: qatañ karantin jäne wjımdıq immunitet. Ekinşi bağıttı Wlıbritaniya men Şveciya biligi tañdağan. Biraq tez dendegen virustı jeñu qiın bolğandıqtan, Wlıbritaniya ekinşi bağıttan bas tartıp, elde tötenşe jağday engizdi. Al Şveciya bastapqı scenariyge ümit arttı.

Tört ayğa juıq uaqıtta Şveciyada qoğamdıq kölik qozğalısına şekteu qoyılğan joq, mektepter men balabaqşalar qalıptı jwmıstı jalğastırdı. Şveciya ükimeti däl osınday täsil densaulıq saqtau salasına auırtpalıq äkelmeytinin ayttı. Şved därigerleri twrğındarda virusqa tözimdilik qalıptasadı dep boljadı. Alayda wjımdıq immunitet payda bolğan joq.

"The Qazaq Times"