Tälipterdiñ Auğanstandağı bilik aumağı wlğaydı. Foto: VOA.

AQŞ-tağı prezident saylauınıñ nätijesi belgili bola salısımen Auğanstandağı Taliban wyımı mälimdeme jasadı. Olar Jo Bayden resmi türde prezident bolıp jatsa jıl basında AQŞ-tıñ qol qoyğan beybitşilik kelisimin saqtap, Amerika tarihındağı eñ wzaq soğıstı bir jolata toqtatuın ümit etken.

Tälipterdiñ ökili Mwhammed Naim aqparat qwraldarına bergen jauabında: «Bwl kelisim Auğanstan men AQŞ-tıñ müddelerine säykes keledi. Kez-kelgen iri özgerister kelisilgen türde jüzege asırıluı kerek. AQŞ-tıñ endigi ükimeti de jalğasıp jatqan beybitşilik kelisimin saqtaydı dep ümittenemiz», – degen.

Esteriñizde bolsa, 29 Tramp äkimşiligi men Taliban arasında kelissöz mañızdı nätijege jetti.  Kelisim boyınşa, 2021 jıldıñ mamırına deyin Auğanstannan barlıq amerikalıq äskerlerdi jäne NATO äskerlerin «şarttı türde» şığarıp ketui kerek. Bwnıñ esesine tälipterge Auğanstandağı şeteldik küşterge şabuıl jasamau, «äl-Kaida» jäne «Islam memleketi» terrorlıq wyımdarınıñ Auğanstanda äreket etuine jol bermeu mindetteri jüktelgen. Sodan bastap auğan jerindegi amerikalıq äskerler sanı 13 mıñnan 4500-ge deyin qısqardı.

Tälipter men AQŞ arasındağı kelissözderden keyin Auğanstannıñ işki dialogı bastalğan edi. Alayda, Dohada ötip jatqan kelissözder türli dauğa wlasıp, soñğı kezderi jalğaspay toqtap qaldı. Auğanstan prezidenti Aşraf Ğani de jeksenbi küni Jo Baydendi saylaudağı jeñisimen qwttıqtağan. Ol da Kabul men Vaşington terrorizmge qarsı jäne beybitşilikti nığaytu salasındağı baylanıstarın tereñdetedi dep ümittenetinin bildirdi.

Tramp saylau kezindegi mälimdemesinde Auğanstandağı barlıq amerikalıq äskerler Rodjestvonı üyinde qarsı alatının aytqan.  Biraq, qarapayım auğanstandıqtar bolsa Jo Bayden kelip amerikalıq äskerlerdiñ elden ketu qarqının bäseñdetedi, sol arqılı twraqtı beybitşilikke jetuge küş saladı dep ümittenip otır.

Bayden saylau qarsañındağı mälimdemesinde, eger ol prezident bolıp kelse «äl-Kaida» jäne «Islam memleketi» sındı terrorlıq toptardıñ soğıs jürip jatqan elden AQŞ müddesine qauip töndirmes üşin azdağan äskeri küşti saqtap qalatının aytqan. Sonday-aq, ol AQŞ-tıñ Auğanstandağı jağdayğa kiliguine qarsı bolğan. Degenmen, aqpan kezinde Bayden «Auğanstanda eşqaşan ıntımaq ornamaydı» degen mälimdeme jasap, auğanstandıqtardıñ nalasına qalıp edi.

Ayta ketu kerek, AQŞ pen Tälipter arasındağı kelisim jüzege asıp jatqanımen, Auğanstandağı zorlıq-zombılıq küşeyip ketti. Tälipter eldiñ basım aumağın özine qaratıp, Kabul biligin ığıstırıp keledi.

“The Qazaq Times”