Parlament saylauı qarsañında boyına qan jügirgen bilik partiyası Nwr Otannıñ praymerizin ötkizuge qanşa qarajat jwmsaldı? Qarjı qaydan alındı? Sayasi nauqanğa sarapşılar qanday bağa berdi?

6 qazanda Ortalıq kommunikaciyalar qızmetinde ötken brifingte bilik partiyasınıñ işki irikteu qorıtındısına jauaptı hatşısı Arman Qırıqbaev QT tilşisine praymeriz byudjetiniñ esebin beruge uäde bergen. Partiyanıñ qoğammen baylanıs departamentiniñ ökili Şalbaev Bikejan Aydarwlı wsınğan jauapqa qarağanda, praymerizge 230 millionnan astam teñge qarjı jwmsalğan.

«Elimizdiñ barlıq öñirlerinde partiyanıñ auqımdı wyımdastıruşılıq-aqparattıq bazası boyınşa 247 filialı bolğandıqtan, praymeriz siyaqtı auqımdı is-şaranı ötkizuge bar-joğı 230,2 mlnteñge qarajat jwmsaldı», – delingen partiyanıñ baspasöz qızmeti joldağan jauapta.

3 mıñday sağatqa sozılğan jariya pikirsayıstardı ötkizuge jwmsalğan qarajat kölemi qanşalıqtı qisındı ekeni belgisiz. Resmi aqparatqa säykes qarjınıñ jwmsalu reti mınaday:

  • Onlayn translyaciyanı qamtamasız etuge arnalğan qajetti jabdıqtar, debattar ötkiziletin orındardı jäne dauıs beru uçaskelerin dayındauğa, sonday-aq operatorlardıñ qızmetteri – 45,4 mln teñge;
  • «Praymeriz» aqparattıq jüyesi jäne onıñ mobil'dik qosımşası – 40,6 mln teñge;
  • «Praymeriz» aqparattıq jüyesi arqılı tirkeu jäne dauıs beru turalı partiya müşelerine habarlama jiberu qızmeti – 29,9 mln teñge;
  • «Qazaqtelekom» AQ ğimarattarda serverlerdi jalğa beru qızmeti (negizgi jäne rezervtik Data-ortalıqtar) – 29,3 mln teñge;
  • «Praymeriz» aqparattıq jüyesine arnalğan keñ auqımdı internet arnasınıñ qızmeti – 4,5 mln teñge;
  • Partiyanıñ öñirlik filialdarınıñ praymeriz ötkizudi wyımdastıru boyınşa şığındarı (byulleten'der, ğimarattardı jalğa alu, keñse tauarları, poligrafiyalıq qızmetter, bannerler jäne t.b.) – 80,4 mln teñge.

Praymerizge jwmsalğan qarajat «partiyanıñ öz esebinen» delingen. Partiya qwramında 786 805 adam müşelikte. Prezident Toqaev, senat pen mäjilis törağaları, ükimet qwramınan bastap äkimdik qızmetkerleri, mwğalimderge deyin tügel derligi osında. Jarğı boyınşa eñbekke jaramdı müşeler kiruge arnalğan jäne ay sayınğı jarna töleui tiis. Bwl «eñ tömengi jalaqı mölşeriniñ 0,7% jäne partiya müşesiniñ qalauı boyınşa odan da joğarı». Demek 42,5 mıñ teñgeniñ 0,7%-ı, 297,5 teñge.

Al 106 mıñday müşesi bar Jas Otan-da kiru jarnası alınbaydı desedi. Biraq studentter – eñ tömengi jalaqınıñ 0,07%-ı mölşerinde ay sayın jarna töleydi.

Partiyabası, eks-prezident Nazarbaevtıñ senimdi ökili äri sayasi şäkirti, №1 orınbasarı Bauırjan Baybek sayasi nauqan barısında onıñ qatarına «jañadan 42 mıñ adam qosıluğa niet bildirgenin, partiyaişilik jarısqa 10 mıñnan asa ümitker qatısqanın» süyinşiley habarlağan. Bwl – birinşi kezeñ.

Baybektiñ bayandauınşa, aldağı uaqıtta äli eki kezeñ bar. Ekinşi kezeñde audandıq jäne qalalıq konferenciyalar ötip, onda jasırın dauıs beru arqılı tiisti mäslihattar saylaularına arnalğan partiyalıq tizimder bekitiledi. Mwnda üş megapolisten özge öñirlerdiñ kandidattarı audandıq jäne oblıstıq pikirsayısqa tüsedi. Bir qızığı – qazirgi Mäjilis qwramındağı partiya deputattarı üşinşi deñgeydegi partiyaişilik irikteuge qatısatın körinedi. Konferenciya-pikirsayıstardan ötkender oblıstıq mäslihattarğa qorıtındı tizim retinde rezervke alınbaq. Al Mäjiliske arnalğan qorıtındı tizim – «Nur Otan» S'ezinde bekitiledi eken.

Praymerizge qatısuşılar men baqılauşılar Nwr Otannıñ sayasi nauqanın «ädil ötpedi», «ümitkerlerge teñ mümkindik bermedi» dep sınağan. Sarapşılar praymerizdi «bäseke illyuziyasına» balaydı. Naqtıraq aytqanda, sayasattanuşı Dosım Sätpaev mwnı halıqqa emes, «Nazarbaev pen elitanıñ mañızdı böligine «Nwr Otannıñ» äli de qauqarı barın körsetu üşin wyımdastırılğan imitaciya» dese, al  Şalqar Nwrseyit «sayasi qoyılım», belsendi Toğjan Qojalieva «onlayn saylau aldındağı repiticiya» dep bağaladı.

1999 jılı merziminen bwrın ötken prezident saylauınan keyin kandidat Nwrswltan Nazarbaevtıñ saylau ştabınıñ negizinde qwrılğan partiya özin halıqtıq, demokratiyalıq partiya retinde däripteydi. Äu basta «Otan» partiyası dep atalğan ol memlekettik änwran auısqan 2006 jılı Nazarbaev esiminiñ alğaşqı buını qosılıp, atauı «Nwr Otan» dep özgerdi.

"The Qazaq Times"