Qırğızstan astanasında küzet küşeytilip, äskeri qızmetkerler, policiya jäne halıq jasaqtarı qorşauğa alğan. Bwl turalı qalalıq İİB habarladı.

Vedomstvo habarlamasında: «12 qazan tañerteñnen beri astanadağı ahual twraqtı. Bişkek qalası täulik boyına Qarulı Küşterdiñ, işki ister organdarınıñ jäne azamattardıñ qoğamdıq qauipsizdigi men tärtipti qorğaudı qamtamasız etetin halıq jasaqtarınıñ qorğauında», – delingen.

Mälimetterge süyensek, qazir elde kölik qozğalısı qalıptı rejimde jürip jatır. Barlıq käsipkerlik ob'ektiler men memlekettik mekemeler tolıq kölemde jwmısqa şıqqan.

4 qazanda Qırğızstanda parlament saylauı ötti. 6 qazanğa qarağan tüni saylaudan keyin Parlamentke öte almağan partiya ökilderi Bişkekte narazılıq şeruin wyımdastırıp, memlekettik organdardıñ ğimarattarın basıp aldı. Sol küni eks-prezident Almazbek Atambaevtı jäne basqa da birqatar sayasatkerlerdi tergeu izolyatorınan şığardı. Eldegi twraqsızdıqtan keyin OSK saylau qorıtındısın jaramsız dep tanıdı.

Bişkekte tötenşe jağday jariyalağan prezident Sooronbay Jeenbekov partiya basşıların sayasi procesti qwqıqtıq arnağa qaytaruğa şaqırıp, Ükimet pen prem'er-ministrdiñ otstavkağa ketui turalı Jarlıqtarğa qol qoydı. Sağat 21:00-den tañğı 05:00-ge deyin Bişkekte komendanttıq sağat engizildi.

11 qazanda Qırğızstanda mitingter men ärtürli akciyalar wyımdastıruğa da tıyım salınğan. Soğan qaramastan, respublikanıñ jaña prem'er-ministri bolıp saylanğan Sadır Japarovtıñ jaqtastarı ortalıq alañğa jiılıp, öz köşbasşıların qoldau şarasın ötkizdi. Al eks-prezident Almazbek Atambaev qayta qamauğa alındı. Küştik qwrılımdar oğan qarsı bwrınğı tağılğan ayıptarına qosa, jappay tärtipsizdik wyımdastırdı degen derek boyınşa is qozğadı.

"The Qazaq Times"